Oté

Toute flatèr i manz dan la posh sak i ékoute a li, I fo pa pran in foutan pou in konpliman !

Justin / 19 octob 2010

Matante Zélida la ékrir Justin :

Mon shèr nové, mon spès salté,
Mi éspèr zot la fine konprann avèk méssyé Didier, kèl koté brinjèl i sharj. Mi éspèr zot la byin suiv nout ti-prézidan dann son parkour la-ba Paris, koman li la tyinbo séktèr, pou pa anpèrde lo larzan La Frans la promète anou. Mèm méssyé Fillon, in promyé minis, la rokonète la valèr nut prézidan, vi k’li la déklar méssyé Didier, sé in négosyatèr rodoutab.Vi voi, mèm la-ba, dan La Frans, i rodoute ali. Zot, bann rouj-de-fon, zot sé marmay tann koté li. Tok ! Pran sa pou toi !

Justin la fé pou répons :

Mon vyé matante k’i koz touzour la boush rouvèr,
I vo myé lir sa ké pa oir lo zyé, antann sa plito k’pa antann zorèy ! Vi kroi vréman sak vi di dann out lète ? Issi matante, vi koné nana dé foutèr d’dan é pa aryink inn. Kan zot la fine roul aou dan la farine, zot i konplimante aou. Zot i di, i pé di ou in moun for pou vréman ! L’èr-la, zot la fine ranpli z’ot posh déssi out kont. É bin ? La ossi lé parèy. Nou té i atann dé gran shantyé, nora aryink inn é gouvèrnman nora fé lékonomi déssi nou. Pardon éskiz matant konm di La Fontaine : « Toute flatèr i manz dan la posh sak i ékoute ali ! ». Donkalor, i fo pa pran po d’shanm pou pla kouvèr, makaroni pou la bouji, in foutan pou in konpliman !

Justin


Kanalreunion.com