Oté

Toute sak i mèt anlèr La Rényon lé bon pou nou !

Justin / 30 juillet 2011

Na dé-troi zour, bann jenn Rényoné la parti fé in tournoi foutbal dann in péi i apèl la Suède. L’avé bann marmay kinzan té i sort Sint-André épi bann marmay trèzan té i sort Sin-Dni. Dann tournoi-la l’avé in kantité lékip in pé toute péi é anparmi bann gran nasyon foutbal. Moin té a-dmandé kossa nout bann ti-dalon té i sava fé la-ba. Epi, moin té i di, dann mon kèr, mèm si zot na poin la shans gingn match, o-moin zot va fé in zoli voiyaz. Lé drol konm in bonpé d’moun La Rényon ni oi nou pti, é lé z’ot ni oi gran. Défoi, in pé i di, ni mank la fyèrté, é défoi lé vré !

Anfin, zot l’ariv la-ba, apré in gran batkaré an l’aviyon épi an kar, lo tournoi la komansé. É nou la komans konète bann promyé rézilta. In l’étonman pou moin, pars bann jenn nout péi té i done la pil bann jenn lé z’ot péi, kisoi lo Brézil, kisoi l’Almagn épi d’ote ankor. Kan z’éliminatoir té fini, la rant dann gran bin, la rant dann lo vré. L’èr-la la kontinyé ziska kar d’final pou bann Sint-André, ziska final pou bann Sin-Dni. Mèm Sin-Dni la gingn la final... shanpyon di mond. Kan banna l’arivé, parl pi si la bate maloya, si la amizé, si la kriy « nou lé shanpyon ! ». La fé la fète !

Toulmoun té kontan... Pa toulmoun, vi k’moin la antann dann in radyo in ga apré di, i fo pa dir La Rényon lé shanpyon, vi k’sé in départman, é in départman i pé pa ète shanpyon di mond. Arzout èk sa li té i répète sa in bonpé foi, konm in moun rolashé vèrbalman. Moin la domann amoin pou kossa La Rényon i pé pa ète shanpyon, épi moin la oubli ali pars pou moin, sé ankor in moun lé kontan abèss anou. Alé oir, pou moin, toute sak i fé valoir anou, valoir nout travay, valoir nout kapasité, valoir lo Rényoné… toute sak i mète La Rényon anlèr, sirtou dann in bon n’afèr, sa lé bon pou nou.

 Justin 


Kanalreunion.com