Oté

Touzis si i di pa sé li-mèm lé résponsab !

Justin / 3 avril 2010

Mi sort lir in nouvèl konm de koi nana plis trèz pour san bann Fransé sré dossou lo sèy la povrété. Ni koné, d’apré bann shif ofisyèl, issi nana plis la moityé d’moun lé an dossou so sèy-la. Kossa ni pé di la-dsi ? Na plis pov La Rényon ké dan la Frans ? Sa ni koné. La promès Sarkozy pou siprime la povrété la fine foiré. Sa ni koné galman.
Arzoute èk sa, nana anparmi bann pov demoun sak lé pli pov ankor : sak, la-ba dan la Frans, i apèl la grann povrété, é sak issi i apèl la mizèr. Nana disète pour san bann Rényoné lé dan la mizèr noir, donk par-la san trann sis mil pèrsone... si mi tronp pa. Sa dmoun lé anbaré partou, avèk toute kalité difikilté... pou pèy loiyé, pèy dolo, léstrésité, mèm manzé lé pa fasil pou zot an avoir. L’èr-la, in bann lé blizé fé la sharité... domann in bon, domann in koli avèk la kroi rouz, sansa avèk d’ote l’asosiasyon.
Sé la vi ? Na poin aryin pou fèr ? Non, nana solisyon, é nout parti i mank pa z’idé la-dsi*, i mank pa fé propozisyon ! Mé lé pli fasil anvoy baladé... touzis si apré i di pa sé li mèm lo résponsab !

* oubli pa lé dé gran sèrvis lo parti i propoz : inn pou l’anvironman, l’ote pou ède demoun dann z’ote partikilyé (l’aide à la personne)

 Justin 


Kanalreunion.com