Oté

Trakass pi po nou, lo dimansh nou lé okipé !

J.B. / 20 novanm 2014

Pou byin konprann dan kèl dogré nou lé, pa nout dogré d’kor byin sir, shakinn i konpran, léta nout péi foutor, léta la rényon. Pa bozwin awar fé zétid tro lontan ousinonsa fé in gran lékol konm sians po ou sinonsa léna, pou byin konprann léta nout péi i lé zordi, minm in marmay la parti lékol zis pou ranplass sonn ti frèr dé zour, li dwa konpran tout, sof si li boush lo zié si li sanfoutsa pou vréman, néna osi i anvoy konm larivé, i di sak lé bon pou ou sora bon pou mwin ou i di ankor, nou pa la èk sa. Pou koz konm sa, fo pou vréman, kiswa rézonn konm in tanbour ou kiswa èt in pé san konprénur ou sinonsa lé dé. Koman néna i anvoy valdingé kan i an parl nout lavnir, nout domin, lavnir nout péi boudikont ? Parl pa zot fé in grèv, di pa zot fo sobat èk lo sindikat i réponn a ou pa bozwin pou rézon « kan la pli i tonb i tonb pou nout tout »

Poitan, zordi néna bokou d’sizé i dovré trakass a nou. Mi sort diskit èk in moun, sanm pou mwin in moun in pé bité, in pé koko dir osi. Li di a mwin li lé pou ké domoun i travay tou l’tan, tou lé zour minm lo dimansh. Koué mi pé réponn a li la d’si ? Daborinn travay la pwin pou donn tout, an dé, minm si navé inn ti ginn in pé i pé atann pou fé domin. Mi diskonvyin pa défwa fo néna travayèr pou la nuit èk lo dimansh kiswa pou lopital, kiswa pou la polis, médsin, ankor dot pétèt. Mi rokoné pou désertin métié i fo. I fo okip domoun malad par ékzanp, asir la sékirité d’moun, mé néna konm komèrs, i pé atann domin, pétèt minm lot domin.

Antronou, dopi touzour lo dimansh, na d’moun i profit pou ropoz in pé, i profit pou rofé lo kor, néna i fé léspor zour la, néna i sava la mèss, in tradisyon pou in pé alé la mèss katrèr, néna i roswa osi, sèl zour i pé rosovwar lo dimansh ? I bwar kafé shé inn, i an profit pou rann vizit lot, kiswa la famy, kiswa lé zami. Nout piknik lo dimansh sa osi lé a nou é pi lo dimansh i profit pou okip osi in pé plis bann marmay. In pé nout kalité d’vi i zinn a zot ? Si ankor navé travay an poundiak, shakinn noré pi konprann, tout manièr, kan néna tout i rokoné, nou lé kab mèt la min ansanm. Epi, zot i krwa pou vréman èk sa i règ problèm shomaz dan nout péi ? Pa sir. Trakass pi po nou lo dimansh nou lé okipé !


Kanalreunion.com