Oté

Trann-sink èr ? Sé bann ti-kolon i sa gingn lo kou la-dan !

Justin / 11 zanvié 2011

Kisa i fé la loi dan la France ? Bann dépité épi bann sénatèr ! Dé foi zot i déside fé par zot mèm, dé foi sé gouvernman i déside fé é i domann azot pou diskité épi pou voté. Dan la France, la loi i mank pa nou ! Bon loi, mové loi, mé pou an avoir, nana. Solman, a s’ki paré, i aplik pa toute. Moin la lir par-la, dann in lartik zournal, nana dé san vinn-dé loi lé pa apliké dépi in vintène z’ané.

I fo dir, shak foi na in koudkongn, i vote in loi. In pé lé kontan. Mé zot i oi pa aplik sa. Mon kamarad Zanbash la di a moin : « mové loi, sa i aplik ! Bon loi, sa i anvoy dingué ! ». Mi vann azot konm moin l’ashté, mé sak lé sir, sé ké so gouvernman-la i koné fé la loi pou raz la pinte travayèr épi demoun dann malizé. Goumantasyon bann minima sosyo ? Zéro kalbas ! La rogoumantasyon l’alokasyon andikapé ? Va oir pli tar ! étsétéra-étsétéra, la ké lo ra.

Sé tan issi, sé lo trann-sink èr banna i ménas. Konm dabitid, lo prézidan i di li lé kont, apré li lé in pé kont, épi li sré près pour, li lé pour. Konmsa va diminyé lo pèyman lé zèr-anplis, é pétète l’Etat nora moins pou dépansé. Tout fasson, la pa bann patron i sava gingn lo kou la-dan, sé bann ti-kolon. Sa lé sir !

 Justin 


Kanalreunion.com