Oté

Transmisyon oral : sak nou fé pasé zénérasyon an zénérasyon, riink dan lo kozman !

Justin / 5 désanm 2013

Pouatan moin la pa lir dan okin liv ; moin la pa vi dan okin dokimantèr ni sinéma dann zaktialité !! Koman dan mon tèt konm ki diré moin la fine viv périod na lontan laspasé La Rényon ; alors, sa i fé listwar mon péi lé ankré dann fon mon lékèr (konm diré in Morisiin) ; dann fon mon lespri !
Mi ginyar pa ekspliké … Moin té ankor pti, dann karo maïs la po planté ; la tèr gro blan, lo vié i détèr ek son pios inn ti pip blan ; zot i koné la pip po fimé ; pétèt té an porsolén ; ki la fime sa, lo blan ou lo zesklav ?
Dan in not karo kann, la po graté, toudinkou i bit si in fèr na la form in flès ; fini rouyé ! Sa in sagay… I ress lo métal, na pi lo mans ! Konbiin tan sa la pérd : anfin la pérd ou la kasièt !?
Sé lo maron la parti la chas ?ou biin lo propriétèr tapré rod a li partou dan la foré ?
I amontr a moin lanklo an gros ros taiyé, i dia moin sa té po choval ; la largamass, giny pa plant riin ladsi, lé zis bon po fé sék kafé…
Laba in gran sominé, ni koné pa tro koué li la anservi ; fé gri kafé ? fé bouyi maniok po giny tapioka ?
Konbiin domoun té travay dann toute so vestiz gran batiman… zordi tou sa la été détrui po fé lozman liméb, sité ; rod pi ton somin kane, la pi ; la détrui nout patrimoin !
Lot koté, dé gran poto béton larz sak koté la Ravine konm po fé pas tuyo do lo dépi bann térin laban o, dépi labitasyon X po nouri domoun ek zanimo térin madame Franchin pli ba ; 18 juillet 1839 ; ti koné sa lé in pé vié !
Transmisyon oral mé sré enkor mié si ni giny ékri !

 Justin 


Kanalreunion.com