Oté

Trant pyès larzan pou tra-i lo pèp épi son l’avnir !

Justin / 22 zwiyé 2011

Moin la antann dann télé, NKM, minis lékoloji la Frans, apré ésplik son plan pou prépar bann shanjman klimatik pou la Frans. El la drès in katalog dé-san-trant mézir pou, soidizan, prépar l’avnir lo péi. Mi koné pa ankor lo bann mézir, mé, sanm pou moin, sa in zanr pansman dési in zanm de boi. Lé vré, larzan sé pa toute, mé kan in minis i déside mète arienk in pé moins sink san milyon pou son plan, moin na konm dan l’idé sa in trik pou fé marsh la mashine la kominikasyon, mé sirman pa pou règ bann problèm an vré.

NKM i baz dési in goumantasyon rant dé épi troi dégré la tanpératir, mé mi pans pa sa lé séryé pou vréman. Pou kosa, d’apré zot ? Lé vré, larzan sé pa toute, mé kan ou i aprann lo pti pé larzan gouvèrnman i vé mète la-dan, ou lé blizé poz késtyon dési lo séryé so gouvèrnman-la. Pli pir, kan ou i aprann l’ané 2010, sé lo l’ané la rojète, dési téritoir la Frans, lo plis gaz i fé léfé d’sèr, é kan ou i koné gaz-la lé résponsab l’éshofmann klima, ou i pé pa prann banna o séryé... konm té i di mon granmèr, sa lé fé pou épate la galri.
Epate la galri, mé sirman la pa pou épate anou.

Pou mon par, mi pans lo shèf bann zil Tuvalu, kan dan la konférans Copenhague li la di, i fo pa kont dési li pou sign lo famé déklarasyon final pars avèk in goumantasyon dé dégré, té i lès ali in sèl shoi, sé lès son péi koulé dan la mèr, épi domann l’Australi in téritoir pou son pèp instal ali épi toush in dédomazman an larzan. Lo boug* la di : « Aksèpt in n’afèr konmsa, sé konm ki diré i domann amoin pou tra-i mon péi avèk mon pèp pou trant pyès larzan ! ».

NB : Trant pyès larzan sé lo pri Juda la toushé pou tra-i Jézu.

* Moun-la i apèl Maatia Toafa, promyé minis son péi dann tan-la.

Justin


Kanalreunion.com