Oté

Travay pou aryin, Travay pou la po patate !

Justin / 22 février 2010

Oplis ni rant dan la kanpagn, oplis mi domann kossa in pé-bonpé i vyin fèr la-dan. Mi vé pa anparl bann kandida l’okazyon, sak lo gaz i monte l’èr nana zéléksyon réjyonal. Non va ! Mi vé anparl déssèrtin kandida inportan, sak i prézante in list é k’ i dovré an avoir z’ot mo pou dir dann la politik La Rényon. Akoz i "dovré" ? Pars zistoman, i diré, in pé, sof l’Alyans, lé pa la avèk sa. Poitan, si mi tronp pa, sé sak ni doi déside dann mèm pa in moi.
Alors ni èmré antann azot déssi in ta d’zafèr... zafèr séryé pou bann rényoné konm koman konbate la mizèr, koman donn travay kréol, koman sékiriz nout pla manzé pou domin, konbate l’ilétrism, anbèk nout péi dann shomin dévlopman, dann shomin lo ko-dévlopman, l’otonomi dann l’énèrzi… koman va fé pou ar-démar l’ékonomi zot mèm la bate atèr. Pars si i vé aryink kal bann projé la réjyon é konm i fo sé pa konbyin lo tan pou monte in prozé valab... l’èr-la, mi oi pa kossa zot v’alé fé konsèy rézyonal dann lé katran k’i vyin... bate la lang ? Tourn lo pous dann in sans épi dann in n’ote ? Kassé pou kassé ?
Si sé sa... travay i mank ar pa : pa in bon travay pou La Rényon, mé travay pou aryin, travay pou la po patate.

Justin


Kanalreunion.com