Oté

Travayèr, sé travayèr, foutor d’in sor ! Demoun, sé demoun kant mèm !

Justin / 3 décembre 2011

Zot i koné l’amyante, mi sipoz ? Sa in drol mové z’afèr. Mèm si li la rann bonpé sèrvis dann batiman, dann pyès l’oto, dann la mékanik, pars lé fasil pou travay ali. Solman, li lé pa bon pou la santé ! Pars èk sa, si ou i travay ali, ou lé riskab an avoir tout sort maladi. Ou i pé gingn l’oprésyon, i pé atak out poumon, out foi, out rin.. ou i pé mèm gingn kansèr. Pa tout suit, mé dousman dousman, li mine aou avèk lo tan. Na lontan, bann travayèr l’apré s’plinn dovan la zistis, mé lo bann ziz té i baz dsi bann z’ékspèr, é banna l’avé tèt dir. Pou dir vré, zot i rod lo bout avann rokonèt sa in produi danzéré. Koméla, i rokoné son danzorozité, mé si out maladi i déklar diz-an apré, ou l’arèt travay, la lé mol pou rokonèt la koz out maladi, é pou donn aou in l’indamnité.
Na dé troi zour, la Cour d’apèl Paris la fé in gran pa dann sans bann viktim l’amyant : li la rokonèt lo droi an avoir in l’indamnité pou bann travayèr la manyé l’amyant, san prékosyon, dann shantyé, dan l’izine. Sak lé intérésan, sa lé pa vré solman pou l’amyant, sa lé vré osi pou sak la viv dann in l’atmosfèr la radyoactivité, épi d’ot danzé ankor. Lé bien, pars sa i fé lontan demoun l’apré soubat pou la vérité. Bravo ! Mil foi bravo !
Solman, mèm zour, kosa mi apran ? Mi apran, in konpagni la Frans la vann dé vyé bato in konpagni l’Amérik di Sid, épi lo konpagni la anvoy lo bato pouri pou dézamyanté dann l’Inn. Sèt-la lé pa bien ditou, vi k’bann travayèr l’Inn i travay san èt protézé, près an short, épi lo pyé dann savat dé doi. Donk, zot i konpran kosa i sava ariv bann travayèr-la. Sépa si zot i rapèl lo “Clémenceau” ? Ali osi té gomé avèk l’amyant, ali osi bann Fransé la anvoy dann l’Inn pou dézamyanté, mé domoun la fé dézord é lo bato la rotourn an Frans. Mi pans, so foi issi, i fo rolèv l’afèr, fé in gro dézord... pars la santé travayèr lé an danzé ; Kisoi z’Indien, kisoi Shinoi, kisoi moun l’Afrik, travayèr, sé travayèr, foutor d’in sor ! Demoun, sé demoun kant mèm !

Justin


Kanalreunion.com