Oté

Tris é an kolèr !
Plizanpli tris, plizanpli an kolèr !

Justin / 30 juin 2012

Gouvèrnman la done in koud’pous lo SMIC. Sa i fé koz désèrtin, sa i fé pa koz bann dépité roz-bonbon, poitan banna i èm kozé outor ! Pétète zot l’avé d’ot shoz pou dir. Mélenchon, pou son par, bandé an trann-sis akoz la rougoumantasyon lé fèb, la di, pou son par, lé konmsi bann ésmikar la gingn in karanbar par zourné d’travay. Son kozman lé intérésan, pars pou li, in karanbar par zour sa i vo in baguète do pin pou in zour-é-dmi ; donk sa i pèrmète fé in konparézon rant lo pri in karanbar épi lo pri in baguète do pin ; Mèm tan, ou i san lo boug na poin tro la konsidérasyon pou lo karanbar. Domaz pars étan marmay, bonbon-la té in bon n’afèr pou nou : té plis k’in pastiy, mé moin k’in karamel, a pépré konm in bonbon loryo.

Mi di sa konmsa, mé sak moin lé sir, sé k’in bann travayèr i aprésyé pa la plézantri, pars dopi lo tan zot i sèr zot sintir, mi pans zot té i kroi té l’èr pou larg in kran. La pa lo ka ! Pir ksa, i prétan i sar rogoumant la CSG, donk i sar raz la pinte lo rogoumantasyon ésmik. Pir ksa, zot i di dan zot kèr : « Sète ané, i koriz bann l’inzistis Sarkozy, mé l’ané k’i vien, zot i domann si i sava pa tonm dsi bann pli pti. Donk dsi zot mèm ! ». Poitan zot i sort vote pou prézidan-la, é sak la voté, zot la ranfors lo mazorité roz-bonbon. Donk zot l’apré a dmandé si zot la pa tir azot, zot mèm, in bal fizy dann pyé. Zot l’apré a dmandé si zot la pa fé in l’érèr.

Mé zot i di, an avoir tir Sarkozy, sa la pa in l’érèr. Konm an avoir tir Raffarin, in pé dtan avan, la pa in l’érèr non pli. Mé si lo nouvo mazorité li pas solman la pomad dsi in zanm de boi, sa i ansèrv de riyin. Zot l’apré a dmandé si zot karanbar moi d’juin lé pa riskab ète in troi-kar d’karanbar moi d’désanm, talèr mèm in domi-karanbar. Zot tète i komans travay, é oplis i travay, oplis i rann azot tris, épi an kolèr ! Plizanpli tris, é plizanpli an kolèr.

Justin


Kanalreunion.com