Oté

« Tro flate in bourik, li fini par pran ali pou shoval ! »

In kozman pou la rout

Justin / 13 novanm 2017

JPEG - 43.6 ko

I ariv amoin tazantan ète an parmi… Pa anparmi in bann dalon, in bann kamarad sinp, in bann moun l’orgèye i touf pa zot mèm si bondyé i désid in zour, piss dsi z’ot tète konm pou done azot in bénédiksyon ! Mé kan mi di ète an parmi sé kan pou in l’okazyonn ou lé mélanzé avèk demoun ou i frékannt pa d’abitid. Bann mounla, konm mi di azot, la pa demounn ordinèr. Ou i diré zot lé konm dann in roprézantasyonin téat si zot i vé ! I fo kroir sa lé inportann pou zot pars sito zot i ariv dann l’androi zot i fé foto ‘zot i tir ‘z’ot prop portré ! Pou bien amontr zot la pa demoun ordinèr. Si tèlman ké ou i pé aplik azot kozman moin la mark an o la mé la pa solman kozman la. Dan la lang kréol rényoné nana in kozman i di konmsa : atèl in bourik avèk in kalèsh, li pran ali pou in shoval. Nana galman in n’ot kozman k’i di : flate In shat, ala ké li pran ali pou in lion… Alé ! Mi less azot réfléshi la dsi é ni artrouv pli d’van sipétadyé.