Oté

Tyé sèt, blès katorz !

Justin / 7 désanm 2015

Zéléksyon : Lé vré ké lo promyé tour té yèr é sak la di pou yèr, pétète, lé pa tro valab pou zordi. I fé rien mé kant mèm la di ! Lé vré koz la boush rouvèr sa néna in sans. Lé vré in promès i angaj arienk sak i kroi é pa sak i fé. Lé vré, konm di lo kont, la lang la poin lo zo ; mé kant mèm ! kant mèm koué si sé lo règlomann lo zé ?

Pou moin, pèrsonèl, lo vré règlomann lo zé sé dir, sansa ékrir, sak ou lé sir ou i gingn fé pou vréman. Dékrosh la line avèk lo dan ? Lé bon, si ou i gingn, mé la pa bon si ou i gingn pa. Fé trant mil plas travay ? Fé sinkant mil anploi ? Fé trant mil kaz ? Fé plis ankor ?.. Sa lé bien mé avèk kosa i fé sa. Avèk la krash ? avèk la boush ? i pé fèr an rèv mé pa dann la réalité. Sirtou i fo pa fé kroir d’moun ou i sava fé alé oir ou i koné pou vréman lé pa posib fé.

Mi antan dir, par isi, par la-ba, nana dé kandida k l’i promèt tout sak ou i vé. L’onèkté i doi anpèsh aou fé in n’afèr konmsa. Sé in mank réspé sirtou kan ou i koné demoun lé dann la difikilté… Amoins ké ou sé Zoro, amoins ké ou sé in doub-kote.

Ala ké mi pans in zistoir moin la antann kan moin té pti. Sé zistoir in tayèr d’linj na moush dann son l’atlyé. Li trap in toil épi li bate dési : li tyé sète moush épi li blès karorz. Ala ké li mark dsi son bandana, « Tyé sète, blès karorz » épi li défil an vil. Demoun i bate la min pou li, i di ala in boug for, li la tyé sèt, li la blès katorz, mé sète koué, katorz kosa ?


Kanalreunion.com