Oté

Tyinbo plito kont de sa !

Justin / 14 avril 2010

Matante Zélida la ékrir Justin :
Mon shèr nové, mon spès salté,
Moin lé sir, zot, bann rouj-de-fon, la aprann Didier, lo bogoss Tampon, la déside mète in kou d’frin bann projé zot la fé k’i koute dé mil é dé san, kaziman la po d’fèss Kréol. Poitan, dann zot fonn kèr, zot i doi pansé na poin aryin lé ossi rézonab ké sa. Mé rézonab, pétète sa in mo zot i koné pa kouk i lé... Konm di bann marmay lontan, zot sré plito rézodyab. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
M’a dir aou in n’afér : sé an rézonan konmsa ké nana in grann savane dovan pti marshé Sinni, sé konmsa k’i fèr ar pa la plaz, lo Zénith, in por plézans. Sé konmsa ké plito k’alé an avan, ni kil an aryèr... Dizon, in pé plis noré pa fé la route tamarin in si gayar shé-d’èv. In pé plis nora pa fé baskilmann lo dépi l’èst ziska dan l’ouèst. Sé konmsa k’lé riskab pa fé lo tram-train... Pli pir, l’éspri la modèrnité, l’éspri l’inisyativ, l’éspri l’inovasyon lé riskab étinn, é si li tinn, sar pa fasil ditou pou ralime ali. Tyinbo plito kont de sa !

Justin


Kanalreunion.com