Oté

Tyinbo séktèr : Sé sak i fo pou nou !

Justin / 30 zwiyé 2009

Matante Zélida la ékrir Justin :
Mon shèr nové, mon spèss salté,
Bin, zot zorèy i sif pa don, zot, bann rouj-de-fon ? Zot i antan pa, zot i lir pa tousa kritikassyon demoun i anvoy pou zot : kisoi dann radyo, kisoi dann télé, kisoi dann zournal. Si moin lété z’ote plas-la Baya ! Néna lontan moin té fine arnons fé dé-troi z’afèr. Ankor si lété d’moun bète i domann azot pou arète inn-dé z’afèr, mé d’moun intélizans ossi i di azot k’i fo pa fé tèl shoz, i fo pa fé konmsa, i fo pa pran tèl moun. A ! Pour sir, zot nana tète dir ! Zot i pans zot sé lo mètr dan toute gran batay sak i vyin ? Tansyon ! Konm di lo kont : mètr an mètr, va trouv son mètr ! Alé, pran sa pou zot !

Justin la fé pou répons :

Mon vyé matante k’i koz toultan la boush rouvèr,
Moin lé byin kontan antann aou dir in n’afèr konmsa, pars kan ou i di nou nana tète dir, sa i vé dir, pou moin, nou lé désidé, nou lé détèrminé é la pa in bann kriyèr d’nuite va nyabou fé shanj nout l’opinyon. Matante, kan nèrvis-la-droite téi vyin bonbarde la kaz défin mon momon épi défin mon papa, nou la pa shanj l’opinyon. Nou la rèss rouj-de-fon konm ou i èm apèl anou. Zordi, kan nout bann dirijan nana résponsabilité, moin lé kontan oir k’zot arkil pa. Inn foi zot i pran in bon désizyon pou nou, pou nout l’avnir, pou lo pèp rényoné, zot i ronons pa... Zot lé pa kouto détayan, zot lé pa fèy vakoa, zot lé pa shanj ékors, zot lé pa non pli koman koulèv k’i shanj de po, zot i tyinbo séktèr é sé sa k’i fo anou !

Justin


Kanalreunion.com