Va évit in pé kass zot koko dsi in list in santène produi !

Moin lé a d’mandé si mon bann léktèr lé pa riskab ète fatigé avèk sak mi ékri. Moin lé a d’mandé si zot i sava pa mazine mi pran mésyé Lurel konm tèt détirk. In tèt détirk, zot i koné kosa i lé ? Dizon in souf doulèr, ou sinonsa in bransh a tèr demoun i marsh dési. In pé lé mèm kapab pansé mi anvé d’li.

Mi anvé pa d’li, plis ké mi anvé d’in n’ot, mé kan in minis, sanm pou moin, i donn linprésyon li kroi nou la tyé kouyon pou pran son plas, l’èr-la lé normal i avèy ali konm i vèy lé dsi l’fé. Zot i koné, na in bonpé sizé lo ga i fatig demoun, mé lo pli fatigan sé son famé list Lurel. Moin la fine gingn lokazyon vid mon sak dsi so list-la, moin la fine di, so list-la, mi èm pa li é moin la fine di pou kosa mi èm pa li. Mi rapèl zis in rézon : mi èm pa kan i fé an sort tout demoun i manz la mèm soz, i tiliz lo mèm produi. Konm di lo kont, mi trouv sa in n’afèr bien an-nuiyan, l’annuiman la énèt avèk liniformité.

Solman zordi, moin na in lidé pou donn mésyé Lurel. In lidé bien sinp, in n’afèr lé bon pou tout bann péi l’outre-mèr. Koman sa i apèl ? Sa i pé apèl libèrté nout komèrs éstèryèr, donk lo droi ashète sak nou la bézoin avèk bann péi lé pa tro loin, i vann pa tro shèr, i pé an avoir bon produi. In légzanp péi : l’Afrik di Sud ! Sa lé pa loin La Rényon sa in péi modèrn, é sa nana tout sort kalité produi… Donk la libèrté d’komèrs avèk l’ékstèryèr, ala pa in bon lidé ?

Justin

NB : an pliské sa, sa va èvit in pé kass zot koko dsi in sèrtn list in santène produi.