Oté

Va oir apré ! Zordi i vanz !

Justin / 12 octob 2010

I pé partou dan la Frans, konm issi La Rényon, demoun i manifèss. La polis i konte a son fasson. I raz la pinte tan k’sé t’assé. Asoir bann minis va vni di, demoun i komans konprann i fo in réform. Sindika i di pa konmsa. Zot i di tyinbo séktèr !

Dé san katrovin-dis

Moin la antann in madam apré rakonte son parkour. El la pa travay a-titré toultan. Pars èl té okipé soign zanfan. Koman-koman, èl la trap son soisant-an. Konm tou l’moun, èl la fé son demann salaryé. Té pa si konpliké ké sa ! Mé soman, kan èl la gingn papyé la kèss, in pé plis, son kardyak té i lèv. El la lir lo shif té marké, èl la rolir. Mon dyé ségnèr, koman i fé pou viv avèk dé-kat sou konmsa ?

Daoir banna la tronpé ?

In kopine la di a èl, i fo alé rode in pé l’boute. Rodé lo boute, rodé ankor, désann, monté, désann, monté. Mé pou finir, bann moun byin la ésplik a èl té pa plis ké sa èl té i doi konte déssi, sof si èl i travay ziska soisann-sink an. Lé dir, oui, travay dann mézon. Lé dir, oui… lavé, ropassé, fé kui manzé, nétoiye a-tèr. Lé dir pou vréman. Lé dir, é lé pa si sir ké sa non pli. In koud’maladi i sifi pou kal aou.

Dan la ri demoun i vanj, i kriy, i shante, i bate maloya. La-ba dan la Frans i vanj ossi. Pou kèl rézilta ? Va oir apré. Zordi i vanj, in poin sé tou !

Justin


Kanalreunion.com