Oté

Va tir sa avèk bann moun o-flan,
pou gonf lo pla sak nana plis k’i n’an-fo !

Justin / 8 séptanm 2009

Dann tan-la, kan la koupe kane té déssi la finissyon, kan té i amène l’izine, sansa balans, lo dèrnyé voiyaz, kisoi dann sharète bèf, kisoi dann kamyon, lété konm in zour d’fète. Rant lé dé korn bèf, té i mète in bouké flèr, déssi la kabine kamyon ossi té i fé konmsa. Aprésa, toute bann travayèr, mélé avèk bann propriyétèr épi bann transportèr, té i boir in kou ansanm avèk plézirassyon.
La koupe lété fini... Mé pa pou toulmoun, pars in pé té an rotar, alor voizin, dalon, kamarade té i vyin donn la min pou ède lé z’inn épi lé z’ote. Demoun lété solidèr dann tan-la. In manyèr fèr konmsa lété valab pou vréman. Konparé avèk koméla. Toultan demoun i di sa, san ète sir si sak zot i di lé vré.
Pars l’èr mi ékri mon modékri, bann plantèr l’apré amontré zot lé solidèr. Fransh vérité ! Konm l’Izine Boi-Rouz la gingn in dézagréman, konm i gingn pi moud kane pou in boute-tan, i amène transpor kane l’Izine le Gol. Sa i évite bann plantèr dan l’èst pèrde tro lo tan. Sa la pa la solidarité sa ? Touléka, sé in n’afèr k’i fé plézir, in pti manzé pou lo kèr. Bravo bann plantèr kane ! Bravo ! Moin, pou mon par, mi tir mon shapo dovan zot !
Konte pa déssi moin pou dir la mèm shoz pou bann zizinyé, pars zot lété inkonsékan, zot lété inprévoiyan, zot la fèrm si tan tèlman l’izine san kalkilé si in zour in kanikrosh konm sa lété possib arivé. Alor, éstèr, koué k’i fé ? Va rode in moiyin moiyéné épi va domann lé z’ot pou péyé… va tir sa dan la posh bann boug o-flan, pou gonf lo pla sak nana plisk’i n’an-fo !

Justin


L’ésplikassyon inn-dé pti mo :

Finissyon : kan i tir déssi la fin

Donn la min : ède in pé

Dézagréman : l’annuiman

Plézirassyon : kontantman, in n’afèr k’i fé plézir

In modékri : in pti nouvèl, in pti zistoir, in pti kozman... Par ékri, byinsir !


Kanalreunion.com