Oté

Vakans : In tan pou bouzé ! in tan pou kréé é pa pou konsomé solman !

Justin / 15 zwiyé 2016

Vakans l’arivé ! Zot té i koné pa ? I fo dir vakans i ariv in pé tro souvan koméla si tèlman ké moin lé a d’mandé si bann amontrèr é bann zélèv I koné dann kèl ka zot I lé : mi koné in marmaye li lèv gran matin pou alé l’ékol alé oir li lé an vakans. I pare dann tan l’ékol lit é obli lové si son famiy té I sokoué pa li. Mé alon plito parl vakans !

Pou kosa i apèl sa vakans ? I di in bien vakan kan li la poin propriyétèr ! I di ankor vakans dé pouvoir kan in péi na pi promyé minis dann in péi. I paré solon mésyé google ké lo mo na in rasine dann la lang latin. I vé dir ou lé lib, ou na poin arien pou fèr. In drol z’afèr sa ! Pars dann la lang fransé i di vaké dann son bann z’okipasyon : donk so kou isi ou lé okipé. Oté ! Dann kèl sityasion ou i lé kant mèm !

An pliské sa, d’apré sak mi koné, kan gouvèrnman troizyèm répiblik la désid l’ékol lé obligatoir, li la désid mète bann gran vakans dann l’été é pou kosa d’apré zot ? Pars konmsa bann marmaye té i èd z’ot famiy dann bitasion. Sé dir si lété vakans pou d’bon pars travaye bitasyon na poin in tyé kor dir konm sa pou in gramoun konm pou in marmaye.

Alor afors fé travaye mon koko d’ tèt mi pans moin la trouv kosa i pé z’ète in bon vakans. Dizon in pèryod pou boujé pa konm dann tan l’ékol mé boujé kant mèm in n’ot manyèr é si lé posib bouzé pou kréé, pa pou konsomé solman : donk in vakans prodiktif. Zot i pans pa sré korèk in n’afèr konmsa ?

Nb Si shak marmaye téi pé, dann vakans, aprann a fèr kékshoz li gingn pa, sré in vakans réisi, in vakans pou gingn in nouvo l’élan dan la vi. N’afèr li gingn


Kanalreunion.com