Oté

Vakans !
Ladan ossi
nana l’inégalité !

Justin / 25 zwiyé 2009

Vakans ! Sa lé vréman èkstra. Plis mi armonte dan l’tan, sé plis mon kèr lé an zoi kan mi pans vakans !
Dann in tan, té i apèl sa ossi shanjman d’èr : in pé té i par La Plène dé Palmis, sansa La Plène dé Kaf, dé sèrtin té i sava Do d’Ann, sansa Lé Liann, sinon dot z’androi ankor. Kan ou té laba, in sèl soussi : pass in bon tan, rèspir bon’èr, manz bon manzé, zoué toute la zourné.

Antansyon ! sa té pou lo moi d’zanvié é pou lo moi d’févrié, pars moi daout té i sava la mèr : Sin- Zil pou sét i fé lo blan, sansa Sin-Lé, Tan-Salé, Sin-Pir, petèt ossi Manapani. Mèm soussi : pass in bon tan pou atak la rentré en bone form.

Justin mounoir, ou i rès évéyé pars sa lété rézèrvé pou domoun nana lo pourkoi, lo portmoné lé byin gonflé, pars sat lété o flan, si zot i sar pa la koloni, poinn vakans pou zot. Poinn bon manzé, poinn bon pass-tan ! Aryienk l’annuiman, arienk korvé pou la famyi : dépi kan la rantré té i ariv, lété kom in soulajman.

Koméla la bokou shangé. Bokou shangé ? Malérèzman, mi sort aprann in bon pé kantité marmay lé blizé san-pass vakans par la fot’ lo mank - lo motif - lo pourkoi. Anfin pars zot lé o flan.
Vakans ? La dan osi nana l’inégalité.

Justin


Kanalreunion.com