Oté

Vakans marmay i sar arivé.
Vakans po ki ?

Justin / 9 octobre 2013

Avan té i di, vakans la Tousin, otour 1er novanm, dann rolizyon krétyin. Koméla, ladministrasyon i ogard pi sa. De somèn de vakans po koué, po ki ?

Moin mi di, déza i fo marmay i dégaz la tèt èk zistwar lékol.

Kan moin té pti, mi rant dann sarèt, alé ras zèrb po bèf ; ou ténir la kord, fé manz a zot dann somin, anpès trap pyé mayi èk zot gran lang ; mi aprann pikan, kol-kol, zèrb a bouk, zavoka maron, kane fourazèr, fatak…

Fourmi noir, fourmi rouz, lo gèp, lo mous a myèl, lo souri, lo ra i ronz pyé kann, kaiy épi pèrdri.

Mi argard mon bèf — té i apèl Berlié — in koupé ; la koup a li po li pa devnir mésan.

Zafèr moin la apri dan mon vakans la ansèrv a moin ziska zordi.

Dévlopman dirab : èk lo fimyé, la sann, lo bann zaktivité agrikol san zapor simik, donk san polisyon, mon vakans té i aport la santé.

Pli gran, moin té monitèr koloni, mi akonpagn zanfan Do-d’Ane, Èl-Bour, La Saline, Etan Salé, mi amontr a zot santé, dansé, zoué koléktif.

Mèm si kan moin té pti, koloni la FOL, lo vyé té anvoy pa moin pars falé lèv kann po mèt dann sarèt, ténir la kord la vas po èd lo koupé ral lo sarèt dan la pant Pazik, dann fon Boi d’Oliv kan i sar lizine.

Mi koné, zordi, ankor bon pé famiy i ginye pa anvoy zot prozénitir (zot zanfan) an koloni… pourtan, kan ti abit la Plèn dé Kaf, paran i anvoiyré bien zot ti bout moun koté la mèr là i fé so… Sinon, kan i ariv moi d’désanm, in fami Sin-Benwa i èmré anvoiy lo bout shou la Plèn dé Palmist.

Zot i kroi lé touzour posib ?

Vakans i ariv po ki ? Pa po tout moun !!

Justin


Kanalreunion.com