Oté

Vanj kont l’ilétrism : mi souèt tan-la i ariv !

Justin / 30 mars 2012

L’INSEE i arèt pa déklar bann shif, é lo bann shif lé pa bon. Sa lé vré dopi in bon koup de tan. Kisoi lo kantité shomèr, kisoi lo rokil la prodiksyon intèryèr, kisoi bann shif dsi lo dégré d’mizèr, kisoi ankor lo nonm demoun ilétré. Biensir, lo nonm z’ilétré i diminyé pa. Dèrnyé shif moin la antann, sé san-vin mil pèrsone. Sa i fé in bonpé d’moun, sirtou dann in péi nana uit-san-karant mil moun.

Mi pans pa bann gouvèrnman i sousyé in n’afèr konmsa. Moin la pankor antann dir i mèt lo paké dann in plan pou vanj kont l’ilétrism. I kas la blag la dsi, i fé la kom, mé fé vréman kékshoz an rapor avèk lo problèm, mi oi pa. Ni pé romark pou lozman sosyal, pou shomaj, pou lo dévlopman, lé parèy. Sanm pou moin, i fé pa lé shoz konm k’i fo pou règ in késtyon, i fé arienk antrotonir lo boubou... mé alon arvir in kou dsi l’ilétrism.

Lé posib, lé pa posib vanj kont in n’afèr konmsa ? Mi pans oui. Mi pans mèm lé posib aprann fransé épi kréol dan l’ékol biling. Mi pans galman lé posib vanj kont l’ilétrism an kréol épi an fransé. Dimansh pasé, moin la antann Mélenchon dir si li gingn z’éléksyon, li va fé in plan pou siprime l’ilétrism dann in péryod sink-an, épi li la nonm konm modèl Cuba, Vénézuèla. Sa i fé lontan mi pans sa, é mi souèt tan-la i ariv.

Justin


Kanalreunion.com