Oté

Vanj pou la liberté ? Sa ni koné !

Justin / 16 zanvié 2015

Pou sak i pans La Rényon lé né kan zot l’ariv Gillot, ou pou sak i pans La Rényon lé né avèk zot, pétète zot i pans nout péi étan, konm in pé i di, « in bout La Frans » sé in péi la libèrté. Poitan i fo pa i obli nout péi la konète lésklavaz, lo réjime kolonyal, sistèm zangajé lété pa roz, é zordi ankor nou na in sosyété l’inégalité. Sé dir si La Rényon nana léspèryans lo mank libèrté é lo mank l’égalité.

Ankor in n’ot afèr la poin si tan tèlman lontan nou la konète la frode éléktoral ; nou la konète la réprésyon kont sak té i vanj pou la libèrté. Donk tousala i fo pa obliyé : i fo pa di lo pasé sé lo pasé, é tousa la pass dann tan la marine a voil. Listoir i fo pa obliyé, sirtou si ni vé pi sa i rokomans.

Tousala i vé dir si na in kanpagn zordi pou la libèrté bann zournal, nou lé pour, ni sign dé min mé sa i anpèsh pa nou oir klèr… oir ké souvan dé foi désèrtin konba pou la libèrté i déboush dsi la réprésyon, la guèr, lo bonbardman bann péi pa tro loin d’nou é dan so bann péi demoun i konète pa la pé, i viv pa trankil é shak zour zot i oi tyé, oprimé, ésploité épi fane la mor. Donk, pou moin pèrsonèl, ii fo shakinn i rogard ali an fas, pou oir si li la poin arien pou roprosh ali. Konm di lo kont, si i san pa bon, mi komans par rogard dsou mon soulyé.
Pou lo rès, mèrsi pou bann donèr d’loson, é pou loson zour apré zour zot i vé done anou, m’a dir azot sinploman : vanj pou la libèrté ? Sa ni koné !

In kozman pou la rout : « Baton i shanj de bout »


An prinsip baton nana dé bout : in bout ou i tienbo dan la min, in bout pou tap desu. Kan i arash baton dann out min, si i nyabou, l’èr-la baton i rotourn kont ou. Sa sé lo sans prop. Dann sans figiré nana profitèr in koté, bann z’oprimé l’ot koté. Majine in zour na in révolisyon é baton i shanj de bout. Bann z’oprimé i korij bann z’oprimèr… Mé fransh vérité si bann z’oprimé i libèr azot sé pou libèr la sosyété, donk pou siprime lo baton. Sa i doizète vré dann bann rolasyon nor-sid, konm dann bann rolasyon rantre klas sosyal. Sansa sa i ansèrv de riyin . Lé dir po suiv ? Fé travay zot koko, fé bouy zot matyèr griz, zot va oir si rant-rant ni tonm pa in pé dakor rantre nou.


Kanalreunion.com