Oté

Veni, vidi, vici ! Moin la vni, moin la vi, moin la vinki ! Kèl vinki mon dié ségnèr !

Justin / 13 séptanm 2014

Lo Prézidan Hollande la vni La Rényon. Li la pa pèrd tro d’tan avèk nou,.. Sirman pou romèrsyé bann rényoné pars zot la vote pou li avèk in majorité plis soisann-dis pour san. Tout fason, astèr ké la fimé la fine pasé, i artrouv tout lo déga ké ni koné. Na kant mèm in n’afèr k’i rés, é bann mèr la pankor bien konète sak i sava arivé. Pou kosa mi di sa ? Pars gouvèrnman la désid diminyé lo poursantaz bann koléktivité lokal dsi bann kontra pou l’avnir. Touléka, bann rényoné san travay la bien antandi sak lo ga la di ; li la di : « Vinn-sink pour san lé tro for pou zot, é bin mi déside armenn zot kot-par a dis pour san ». L’èr-la, san alé rod pli loin demoun san travay la di, sé lo bann mèr la fote si na poin travay.

Si lo prézidan té i vé mète dézord dann nout péi li noré pa gingn fé myé ksa. Astèr ou i antan bann jenn tèl androi la désann dann la méri, pou alé dmann travay. Ou i antann sin-Pol, in ga la vers lésans dsi li é la ménas mète dofé épi la ménas lo mèr l’androi -zordi li dor an tol ! Nora touzour la plas k’i fo pou bann viktime lo movèz politik !- Mi pans sa i sav pa arète la, pars nout tout i konénout pèp i pas la mizèr… Lo kèr dé gronouy i kontinyé koasé : nou va vote la konfyans, pars myé k’sa i pé pa. Lé pa posib fé in méyèr politik ! Ni kroa, ni kroa, n kroa !

Lé pa posib ? Bin alor diskour Sin-Lui sa i kont pa don sa ? Dévlpman dirab sa i kont pa ? Parl pi la défans l’anvironeman : i diré na arienk bann rodèr d’gèp, bann shasèr tang, bann piknikèr, bann demoun la fé zot kaz an frode, épi bann ti kolon i doi réspèk sa. La rout an mèr, bravo ! lo goudronaz la plaj, bravo ! Klima na l’éshofman : shofé madam Desbassyns ! Pandan stan-la, nou na in péi, nou lé nonbré dsi nout galé, na dé shoz a fèr, na in péi pou dévlopé, in l’anvoroneman pou protéjé, nout l’agrikiltir pou shanj modèl, nout dékolz ékonomik pou asiré.

Veni, vidi, vici ! Moin la vni, moin la vi, moin la vinki ! kèl vinki mon dyé ségbèr ! Dézord i mank anou ?

NB-In patoi pou la rout : « mète l’otèr dsi lé zot ». Sé kan i di : « la pa moin la fot, sé l’ot ! ». Bann marmay i yèm bien fé z’afèr konmsa. Pa arienk marmay, bann gran moun osi. An parlan, zot i rapèl so l’èr d’mardi gra té ki di konm sa « Pardon konpèr, la pa moin l’otèr, madelène la fini parlé, tir-tir pinèz dann son korsé ». Mi arète la, zot osi mi pans zot i pé fé travay in pé zot koko la dsi.. ;pa dsi lo korsé, mé dsi lo léksprésyon.


Kanalreunion.com