Oté

« Vèye sa konm lé dsi l’fé ! »

In kozman pou la rout

Justin / 10 désanm 2016

Zot i koné ankor kosa dolé i fé kan i mète ali dsi l’fé ? Pétète avèk sak i apèl la pastérizasyon sansa la éstérilizasyon zot na pi l’okazyon oir lo tourné-viré do lé dsi l‘fé. Si zot lé dann in ka konmsa, mi pé dir azot lo lé i bras i bras, i roul dsi li-mèm, épi toudinkou alal ké li mète a monté ziska tonm dann fé épi tinn ali. Sé pou sa, i fo avèyé kisoi pou tir ali dsi l’fé kan l’ariv lo tan, kisoi pou tinn lo fé. Astèr, kan nana in n’afèr délika i fo ou i port antansyon toultan i fo pa larg ali la pars si ou i fé konmsa ou lé sir i sava fé déga. Sé pou sa moin la mark kozman zot i pé lir an-o la. Mi lès azot kalkilé pou oir dann kèl ka i fo aplik nout kozman é dann kèl ka lé pa nésésèr. Alé ! Ni artrouv pli d’van sipétadyé.


Kanalreunion.com