Oté

Viktoir politik ?
Viktoir éléktoral ?
Sa la pa forséman lo mèm z’afèr

Justin / 18 septembre 2012

Pou in bonpé d’moun, in viktoir dann in z’éléksyon sé in viktoir politik, pars sé in viktoir pou lo parti k’la ranport lo z’éléksyon. Solman, kan ou i fé bien travay out koko, ou lé blijé konstaté ké lé pa si sinp ké sa. Parèy kan ou i pans, si in l’advèrsèr out parti la gingn in batlavé, sé in viktoir pou out parti. Lé pli préférab bien kalkilé avan épi apré.

In l’égzanp ? L’ané 2008-2009, la droit la gingn in défèt dsi Sin-Pol, donk pou in bonpé d’moun, té la viktoir Parti kominis. Solman aprésa, tout demoun la romark lété pa si sir ké sa, té mèm lo kontrèr sak in bonpé l’avé majiné. So bann viktoir-la, la prépar la défèt nout parti : Elie Hoarau la pas do zistès dann z’éléksyon dépité éropéin, é la pa Sin-Paul la fé gingn ali. Aprésa, nou la pa gingn lo siksé nou té i atann dann z’éléksyon sénatèr, inn solman olèrk gingn dé, épi ranfors nout politik l’inyon. Parl pi la suit : zot tout i koné. I pé di in bonpé l’égzanp konm sa, mé shakinn, moin lé sir, nana in paké dan son tèt. Lo kontrèr lé vré ; nout parti la nyabou, plizyèr foi, dann Konsèy réjyonal ou sinonsa Konsèy zénéral, tir profi in sityasion lété pa tro favorab par l’inyon avèk d’ot parti pou fé in majorité. In pé la anparl l’inyon kont la natir, mé sa la pèrmèt nout péi avansé.

Pars finalman, pou nou, in viktoir politik, sé in viktoir i fé avans nout péi, é in bon viktoir, nout parti la ranport sa, kan li la gingn fé l’inyon bann fors té i vé fé avans lo péi. Si ou lé an minorité, i fo ou i rod demoun pou fé in bout shomin avèk ou. La pa sa la politik d’inyon ? Donk, mi pans i fo bien konèt ousa ou i vé alé pou ariv l’androi-la. Si ou i koné pa bien, sé konm si ou i kas out bousol épi ou i sava in pé o azar... Sé tan isi, i fé in gran déba dan lo parti dsi bann z’indamnité. In pé i rovèrs lo parti, in pé i mèt dan zot posh, in pé i rovèrs sa in sosyété pou prépar zot z’éléksyon. Dann dèrnyé ka, sa i vé dir sé zot i amèn la politik dan zot komine. L’èr-la, sanm pou moin, zot i konfonn la politik, sak i fé avans nout pèp, sanm la politik politisien, sak i pé fé avans azot dan zot karyèr. Zot i pé gingn in viktoir éléktoral, mé pa forséman in viktoir politik.

Justin


Kanalreunion.com