Oté

Violans institisyonèl…

Justin / 20 séptanm 2013

Z’afèr mi rakont la vréman arivé, la spasé na 2 moi.
Fo konprann, a nou Kréol, isi nou lé in kiltir oral, ni avans dan la vi, par sak nou viv, sak nou voi, sak nou analiz, parfoi sak nou sibi, é i fo nou koz po ésanzé antro nou.
Donk, Justin i trouv in gran térin abandoné pars bann z’éritié la pokor trouv léantant po partazé ; li na l’otorizasyon koupé lo ban pié d’boi vèr po son kabri, mé li koup a tèr ; li dégaz, li bril po fé la plas ; li profit li mèt inn ti grin d’poi, mayi, z’anbrovat d’in trou ; mèm lo monmon propriétèr i done a li grin sitrouye, zantak.
Po èt rantab, vakans marmay i ariv, Justin i mont son tant si lo térin.
Ouala ! pa in matin, polisié i débark ! Kat Kréol : « - Oté ! ou na lo droi kamp là ? – Ben, pa d’problèm, madam intèl lé o kouran ; déza dépi moi d’mé moin la fine komans nétoyé… ».
Zot i artourn.
Bayoun, 4èr l’aprémidi, mèm zour, mèm loto la polis…
So kou si, in ti gradé, dizon i sort péi déor, po pa anploy in mo in pé dégradan, son ti barèt zone si z’épol, i avans si Justin dirèk : « Vou z’avé une piès d’idantité ? » — son 3 kolèg kréol i rogard koman i travay kan ou lé in bon polisié.
Bon, Justin trap son paspor : « Vou z’abité toujour… tèl androi ? in téléfone ? vou n’avé pa le droi brulé, vou z’avé de lo ?… ».
Si Justin té in volèr moto, té fine ginye la tranblad, fé dan son kilot.
Justin i pans : « Oté Justin, rès kalm, zèn ! ».
Noré d’koi pran la kolèr, lans in kou d’poin : « Kosa moin la fé a toué ? ».
I apèl sa violans institisyonèl… le sit intèrnèt l’ékol po paran pov, sé osi in sèrtin violans institisyonèl.

 Justin 


Kanalreunion.com