Oté

Vizit ofisyèl ? Tansion lo sindrome Adélaïde !

Justin / 25 zanvié 2011

Mi koné pa si zot la konpri konm moin, mé i prétan dir méssyé Ramgoolam la vni an vizit ofisyèl La Rényon yèr lindi épi zordi mardi. In vizite ofisyèl, sa in n’afèr inportan é sa i doi ète bien préparé par sak i fé l’akèy, konm par sak lé akéyi. Nana konm k’i di lo protokol ki doi ète réspékté, épi in rézilta pou an avoir. Arzoute èk sa, i domann la popilasyon pou vnir rosovoir l’invité. Sa sé in n’afèr d’bon sans.

Maurice, sa in péi indépandan ! Donk lo Promyé minis i roprézant li tousèl sak lé ofisyèl dann son péi. La Rényon... tout lo moun i koné sa in n’afèr konpliké. Pou roprézant sak lé ofisyèl, i fo in roprézantan l’État, lo roprézantan Konsèy réjyonal, sète lo Konsèy zénéral, in pé toute bann z’élu épi bann gran sèrvis. Si la poin sa, sa i vé dir sé in vizite ofisyèl, konm pa. Sa i vé dir la pa in bon l’akèy konm k’i fo.

Moin na konm l’inprésyon la pa in vré vizit ofisyèl. Poitan Maurice sa in péi ni port dann kèr. Ni pé mèm admir ali pou sak li la nyabou fèr dépi son l’indépandans. Épi, La Rényon èk Maurice la fé in bon boute shemin l’istoir, ansanm. É dépi shakinn la pran son prop shemin nou la touzour marsh dizon la min dan la min. Alor pou kosa in vizite ofisyèl an misouk ? Olèrk in n’afèr k’i pète an flèr dann syèl La Rényon ? Aspéron kant mèm lé soz i éspas pa konm la-ba Adélaïde. Kan Didier Robert, in pé plis, té i fé lèv la guèr. Tansyon lo sindrome Adélaïde !

 Justin 


Kanalreunion.com