Oté

Vodo mié biin ransingn a ou avan ékri in nafèr !

Témoignages.re / 11 février 2014

Si zot i lir justin zot la vu na dé zour dsa, moin té ékri « mon péi lé sal, sal, sal, moin lé déséspéré » ; zot i rapèl lo ta la sann lizine sikrièr en lèr o bor in falèz…so matin mi pas par la, lo boug la giny lo marsé zapèl dof té la ék son péltèz …

Mi diskit ék li : « do moun i di out ta la sann i viin polié la tèr, larivièr, ziska la mèr !I fé la bou-la vaz- i tié tout plant dann fon loséan, koué lé vré laddan koué lé fo ? Moin lé kominis, mi vé konprann sak i spas dan mon péi. »

Oté, lo boug, in zinn pétèt 30 tan, pa plis, pa pèrd la kart, li la res kalm, li la biin kontrol a li, mé konm si kantminm pa moin la promièr personn i poz a li lo problinm, la fé a moin po répons :
« Kan la pli i tonm, la rivièr i désann an bou, kél koulèr i viin si la sirfas la mèr ?
- maron-rouz
- kél koulèr lé mon tat sann ?
- gri-noir
- déza inn, la bou dan la mèr lé pa gri-noir konm mon ta la sann !
Ou sa i sort so rézidi ?
- i sort dan la kane
- moin la fé dzétid si lo plan ékolozik, dan so sann na matièr organik, azoté, i dériv la kane, mi tir a li lizine ou sak la kraz, la kui la kane, li artourn ou li sort dan lo karo kane po fèr langré natirèl… laddan na poin transformasyon simik. Mi koné ko sa mi fé ; moin lé ekspèr laddan.
Dayèr, si ou lé kominis, moin osi moin lé kominis ! »

Vodo mié biin ransingn a ou avan ékri in nafèr !

 Justin 


Kanalreunion.com