Oté

« Volèr i vol volèr, lo dyab i ri ! »

In kozman pou la rout

Justin / 9 mars 2016

Zot I pé pa dir amoin zot I koné pa kozman-la ? Si zot I koné pa li, dizon zot I koné pa tomat. Bin alor, pou kosa mi arvir la dsi zordi ? Pars dopi kéktan avèk bann provèrb difisil pou konprann mon koko d’tète té i komans fé mal. Sète-la la pa dir pou vréman ! Anplis sa i éspas toulézour dann la sosyété kan bann z’om d’afèr i asosyé, apré i désosyé, i dékol i rokol. Donk zot i oi bien sa i éspas. Afèr lo dyab i ri ? Pou moin pars lo dyab lé dalon avèk péshé é si volé sé in péshé dé foi volé sé dé péshé. Aprésa bagar i pète : koud poin koudpyé, demoun i fash, famiy i antan pi. Défoi la gèr i pète rant péi pou sa mèm… Mé si lo dyab i ri, lo pèp i plèr : plis soufrans, plis traka, la famine, la mor, tou-sa-la. Fransh vérité i vo myé ète fran dan la vi. Zot i pans pa ?


Kanalreunion.com