Oté

« Vyé shat i èm ti-souri tann ! »

In kozman pou la rout

Justin / 2 mé 2016

Nou la touzour koni - touléka ni pans !- in vyé shat lé pli malin k’in jenn. Li shoizi son manjaye : li koné kosa lé bon pou in palé lo shat é kosa lé pa bon. I paré li évit trap in ra miské, pars okin shat i manj in kalité jibyé konmsa. Donk si i oi inn la krévé, la pa li ké la tyé. Si li la tyé in souri sé pou li manjé é par proférans in souri tann, i kour pa tro vite, i fé pa dé fyenk an kouran épi la shèr lé bon. Kosa sa i vé dir ankor ? Sa i vé dir galman in moun, an zénéral, in n’onm d‘afèr, li asosyé avèk in jenn moun mé pou roul l’ot dann la farine. Mé fyé in vyé z ‘onm d’afèr pars li mète aou dsi l’ki avan ké ou na la tan konprann. Ni artrouv domin si zot i vé bien !


Kanalreunion.com