Oté

« Vyé shate i èm bien souri tann ! » - In kozman pou la rout

Justin / 19 out 2015

Ala in kozman lé bien intérésan. Li pouré konsèrn désèrtin moun rézonab par l’az i èm bien fé la kour bann jenn fiy. Li pouré mé li pé osi konsèrn lo mond dé z’afèr : in souri tann, son kro la pankor bien pousé, li pans dann son kèr toulmoun lé bo, toulmoun lé zantiy.

Lo vyé shat, na lontan li pans pi dé shoz konmsa : li la fine frékant demoun na plis dé vis ké l’izine Bofon, li la fine ète roulé dan la farine, li la fine rouk demoun galman. Donk si ou i fé in n’afèr avèk in vyé shat, tansyon aou ! Sar fine plime out l’arzan avan ké lo kok nora shanté troi foi. Konm i di dann shominn kroi !. Mé tansyon ! Dé foi sé lo kontrèr, souri tann i ariv a roul lo vyé shat. Par égzanp an shofan son kat blé épi d’ot sityasion ankor, moin la poin lo tan épi la plas pou rakonté.

Kosa zot i anpans ? Arien ditou ! Fé travay z’ot koko d’tète ! Fé bouy z’ot matyèr griz ! zot va oir ké rant-rant ni pé z’ète kékfoi dakor rantre nou.


Kanalreunion.com