Oté

Yes, we tram !

Justin / 2 désanm 2009

Koméla, nana in kantité kamyon, in kantité lo kar, in takon loto déssi la route, lo zour, la nuite, défoi la nuite konm lo zour. Sa i roul avèk motèr lésans, sansa motèr gazoil, sa i désarz dan l’èr in kantité gaz i fé l’éfé d’sèr, par takon, par tonn, épi i polyé, i polyé, i polyé mèm... Alon fèr in sipozisyon ! Dizon, si bann motèr-la té i marsh avèk l’èr konprimé, lidrozène, sansa léléstrésité ! L’èr-la, bann transpor prop lé pa riskab polyé nout l’èr... Solman, so bann défilé kamyon prop, lo kar prop, loto prop, moto prop na moiyin ossi fé gran-gran lanboutéyaz konm nana zordi : donk, si i dézanpoizone nout l’èr, i mète anou dir, késtyonn sirkilasyon, é sa sé in n’afèr ni pé pi siporté.
Alor, sé pou sa k’in pé la mazine fé lo tram-trin pou nou déplas assé byin konm k’i fo... avèk lo konfor nou la bézoin, san alé bros noute figuir dann fon kanal, san ète andikap tout nout vi, san alé nonpli donn demoun la mor, sansa bann gro l’inkapasité.
Pou fèr sinp, ni pé dir, si ni ansèrv in karbiran prop, lé byin, mé lé pa assé. Si ni shanj in bonpé transpor individyèl kont bann transpor koléktif an sifizans... la lé gayar, la lé bèl, la lé bon pou nou… tram-train, sa lé bon pou nou. Konm in bann dalon i di : "Yes, we tram !"*

* La pa moin la trouv sa, mé lé si tèlman dos ké mi anprète avèk lo dékouvrèr. Mi romèrsyé ali byin !

Justin


Kanalreunion.com