Oté

Z’éléksyon paran osi sé z’éléksyon !

Justin / 14 séptanm 2013

An so moman po bann pèr é mèr d’famiy na d’zanfan l’ékol, z’établisman skolèr i domann si zot i vé pa port a zot kandida po Konsey l’ékol, Konsey l’administrasyon colèz ou lisé !

Lé konm in vré z’éléksyon po la méri, lo Konsey zénéral, rézional tou sa la.

Na dabor la lis éléktoral : tout bann paran i vot, papa èk monmon i vot in foi, minm si ou na dé troi z’anfan dan l’ékol !

Nana la lis kandida : dan in l’ékol, na otan d’paran ke na d’mèt. Si na 10 mèt, i pé avoir 10 z’éli paran (plis 10 sipléan), sa i fé in lis kandidatir o plis 20 moun.

Donk, sèt ané, i vot le vandredi 4 oktob (dan in lisé, si i travay lo samdi, i pé mèt lo skritin samdi !)

Alé pa ray in non si lo biltin, biltin la sra nil !

Aprè 4 èr, i vid l’irn, i razout bann vot par koréspondans, i kont, i dépouy, si na plizièr lis, i fé in prorata.

In résponsabilité po lo bann z’éli ; ou sra konvoké po rényon, mé ou i giny koz po tout bann paran si lo régleman, lo bidzé, lo sorti skolèr, la kopérativ, bann voyaz ; ou i giny di out mo si lo prozé d’ékol.

Lo parténèr, sé la méri, Konsey zénéral, Konsey rézional.

L’administrasyon na bann z’inspéktèr, réktèr, ziska minis.

Nou koné èk ki sa nou doi kozé po règ problèm ; anfin, kan i vé ékout a nou.

Sak mi èm pa, sé kan si bann radio, paran i étal tout z’afèr si la plas piblik. Mi trouv na d’ot fason règ in problèm transpor, kantine, z’abor, sorti l’établisman ; intéroz bann z’asosyasyon paran, va dir a zot koman i fo fé ! Donk, adèr dann z’asosyasyon po èt pli for, paran z’élèv, sa prèsk in métié !?

Justin


Kanalreunion.com