Oté

Z’évènman Chodron :
In sinp zékli d’fé i pé mèt dofé dan la plène !

Justin / 20 séptanm 2012

Mardi soir, la pas in télé-fime si Rényon Promyèr. Fime-la té i port dsi bann z’évènman dann kartyé Chodron. In télé-fime konm sa lé touzour intérésan, pars i fé roviv bann z’imaz la pas dann télé, épi bann pèrsonaz la viv bann z’évènman-la. An plis ké sa, konm sé in kartyé d’vil, sak la fé lo fime la sèy anparl in pé lo kartyé tèl ké li lé koméla, koman i lé bann zénès i viv dann kartyé-la, kosa zot i fé, kosa zot i vé. Lé bien lo zafèr ! I fo dir, sak i èm nout l’istoir épi la vi dan nout péi noré tor fé lo pti boush kan i tourn in fime konm sa. Arzout èk sa konsékans sa nana ziska zordi… konm i di dann langaj fransé, lo bann sékèl.

L’okazyon lété bon pou done la parol lo mèr dann tan-la, vi k’sé lo mèr zordi ankor : mésyé Annette. Konm lo boug lé pa né yèr, lété sir li sava sèy tir ali in pé dann trin-la. Pou kosa li té i doi dédouane ali ? Pars si mi tronp pa, sé li-mèm la dmann i sézi bann z’émétèr Télé Freedom. San savoir kèl rézilta sa té i pé an avoir. Arzout èk sa, lo préfé dann tan-la, i pé dir li té in pé lézé, mé in préfé, sa i pas é li la pa bézoin bien konprann la popilasyon. Moin la fine konèt in bonpé préfé, é si in zour i désid fé in fime dsi bann préfé la pas La Rényon, mi pans nora dé shoz pou dir é sar pa pou fé onèr azot. Movèz politik l’Éta, mové préfé : inn i sava sanm l’ot, mé nou nora lo tan arparl dé sa. Dann z’évènman Chodron, dann tan-la, lo mèr Sin-Dni konm lo préfé la pa tro gingn fé lo bon shoi.

Alon parl ankor in pti pé mésyé Annette. Momandoné, li di dann fime : èk sinkant-sink pour san bann jène dann shomaz, i fo la révolt i arpèt. Pétèt li na rézon, pétèt li na tor, pars souvan défoi, i pèt dsi in n’afèr ou i pans la pa in n’afèr d’fon. In zékli d’fé i pé mèt dofé dan la plène, konm Lénine té i di. Nana si tèlman l’inzistis, si tèlmann moun pa kontan, si tan tèlman la ène é lo rogré dann kèr d’moun pou lo sor i fé azot ké bann z’istorien, in zour, nora lo shoi, mèm l’anbara lo shoi, kan zot va sèy ésplik la rézon lo gran boulvèrsman, si sa i ariv. Mé bann politisien, konm lo mèr Sin-Dni, épi son fédérasyon Parti sosyalis, mi pans, zour-la, zot osi, zot va rogard sou zot soulyé pou oir si na poin kèkshoz i san in pé mové.

Justin


Kanalreunion.com