Oté

Z’idé gagnan, konba moityé gagné !

Justin / 4 avril 2012

Matant Zélida la ékrir Justin :
Mon shèr nové, mon spès salté,
Mi vé i shanj amoin an kalimé papaye si bann rouj-de-fon i konpran ankor kékshoz la-dan. Alala Parti kominis i domann bann z’éléktèr vot pou François Hollande. Ziské la lé klèr, sof ké Hollande, sé in sosyalis, é bann sosyalis, ni koné bien, i manz pa dé grinn sèl èk Parti kominis rényoné. In tan, in pé té i di, i fo plime lo volay sosyalis, mé koméla é dopi kèk tan, sanm pou moin bann sosyalis i vé plime lo papang kominis. Di pa moin lo kontrèr pars moin osi mi lir zournal. Solman lé shoz lé pli konpliké ké sa : pars PCR i di pa, vot pa Mélenchon. An kontrèr, i di sa in n’ot manyèr pou ranfors lo bann z’idé Parti kominis. Zot i pans, zot kamarad kominis i konpran in n’afèr konmsa ? Zot i pans, avèk son pti tèt moino, lo Hollande lé kapab konprann in n’afèr konmsa ? A moin ké li di, domin in n’ot zour. L’èr-la, si sé sa k’li majine, bann rouj-de-fon i doi méfyé. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
An parlan par réspé, na d’z’idé dan out vyé koko sèk ! Na d’z’idé pou vréman. L’èr-la, mi pans ou lé paré pou konprann bann késtyon l’éstratézi politik. Ou i konpran, kan PCR i di li va aplik onètman lo z’akor èk François Hollande, lé vré pars li lé fidèl son prinsip : lo réspé la parol doné. Mé li rouv in pti port avèk Mélenchon, pars li koné, l’inyon sé la lite, é lé pa bon èt tousèl dann in l’antouraj pintad. Pars si Hollande i gagn é si bann sosyalis péi i domann la tèt PCR, soi Hollande i anvoy dingué, é la vi i kontinyé, la lit galman. Soi li di, mi anlav lé min, é li manigans ann’dsou : l’èr-la, la lite i kontinyé é zamé nou sar pa tousèl dan lo konba. Pars dan l’afèr, nout parti, konm bann zouar i di, nana in kou an avans. Li la fine fé pas son bann z’idé ; li la fine mèt son z’idé anlèr, é i arvien pi dsi. Donkalor, si son z’idé lé gagnan, lo konba lé déza moityé gagnan. Matant, ou i koné, kisoi Mélenchon, kisoi Hollande, promyé foi i mèt nout z’idé anlèr. Tok ! Pran sa pou ou.

Justin


Kanalreunion.com