Oté

Z’istoir lo trin : Lé pa di k’i fé pa, mé i fé pa san konba ! Nout déstin lé marké konmsa !

Justin / 31 mars 2012

Na poin tro lontan, moin la antann Elie Hoarau di, nana in batay pou lo ray pou améné. Moin lé sir li na rézon, mé mi koné galman, bann monopol an konplisité avèk gouvèrnman lé pa désidé lès anou bien avansé. Lé normal pars sa i sava pa dann diréksyon zot z’intéré. In prèv ? L’arzan ni gaspiy dan bann produi pétrolyé. L’ané 2010, Paul Vergès té i parl sink-san milion l’éro. Astèr mi antan dir sèt-san milyon. I tard pa in milyar. L’èr-la, koman i sava domann bann profitèr abandone so milyar-la ? Si i fo mèt dis milyon dann in z’éléksion pou défann zot z’intéré, mi pans zot lé kapab fé. Mé si nou ni obliz fé, nou lé riskab gagné so kou isi.
Solman lé bon konèt in pé la vérité dsi lo trin. L’ané 1882, in konpagni, lo CFR (shominn fèr épi por La Rényon), la nyabou fé in trin dopi Sin-Bénoi ziska Sin-Pyèr, mé l’ané 1976, gouvèrnman la tras in kroi dsi. Fini avèk lo trin, tout pou kamyon, pou loto. Larzi la rout... étsétéra, étsétéra, la ké lo ra. Mèm shomin lo trin i pas la éfasé, pou pa an avoir l’anvi rotourn an aryèr.
Kan Konsèy réjyonal la difiz l’idé fé in tram-trin, près tout demoun té dakor èk sa. Té i mank pa granshoz pou ariv o-bi, mé par kou d’shyas, Didier Robert la rant la Réjyon é gouvèrnman la apiy ali, mèm si la-ba dan la Frans la fé bann tram, la fé bann trin, é toulmoun, gosh konm droit, té bien kontan èk sa. Défoi mèm, lo nonm voiyajèr zot l’avé prévi la dépasé, konm dan la vil Montpellier, sèt Bordeaux, sèt Nice, épi d’ot ankor. Sak té bien bon pou banna lété pi bon pou nou. Nou z’anfan batar, i fo kroir !
Nout déstin lé konmsa, sak i fé vit dan d’ot androi i fo bonpé l’tan pou fé isi. Bonpé l’tan ? Sa i vé pa dir i fé pa. Mé i fé pa san konba, nout déstin lé marké konmsa.

 Justin 


Kanalreunion.com