Oté

Zabo frazil ké ti koné, la flèm la fain va fé pété.*

Justin / 8 avril 2016

Zot i souvien la gèr dann l’Irak ? Na poin si tèlman lontan sa l’arivé. Touléka, mi rapèl bien sé-pa lo ri la manké, sé-pa lo moun la pans do ri i sava manké, mé in kantité d’moun la parti dann bann gran sirfas pou fé provizyon do ri. Tou zis si demoun té i bataye pa : tousa pars zot la gingn la krintiv mank lo pli nésésèr. Mèm bann demoun bien rézonab l’avé konm pèrd la tète.

Biensir sa la dir in koup de tan é kan l’moun la vi l’avé touzour d’ri dann magazin zot l’arète ashté. Mé zot l’avé si tèlman ashté ké z’ot l’arzan té kourt é si zot l’avé do ri, zot l’avé pi kari épi d’ot nésésité. L’èr-la zot la komans atak magazin pou vol sak zot té i trouv mèm si té pa bien nésésèr. L’été konm in van k’té i rann fou. In pé lé mor brilé dann magazin. Sa la dir kék z’ané sa, aprésa la mode la pasé.

Kosa sa i fé pans amoin sa ? Sa i fé pans amoin ké si nout l’ékonomi lé mal roganizé é li lé mal roganizé v’ariv in zour l’éspri d’moun va anbalé ankor in kou épi v’ariv tout sort dé shoz. Zot i koné l’éspri fèb sa i mank pa sa é dann nout sistèm ni konstat nou lé bien frazil pars nou lé pa mète de nou. Mi koné pa koué zot i pans mé moin mi kalkil lo sistèm dominasyon lé pou kék shoz dann nout frazilité é moin na dann mon tèt la shanson Madina kan i di : « Zabo frazil ké ti koné, la flème la fain va fé pété ! ».

* I shant sa dann « Madina prèt amoin ton grèg » - in shanté par Maxime Lahoppe épi Bénoite Boulard.


Kanalreunion.com