Oté

Zanfan i plèr pa i gingn pa tété !

Justin / 22 séptanm 2015

Vantrodi 11 séptanm la bon o ron pwin kasèrn bann zènn sin pir la désid blok tout. Lavé pwin pou kas la pat in kanar. Sanm pou mwin té pa in gro kililik pou vréman mé konm nou néna bonpé loto si shomin, inn ti nestan tout la éstopé toudinkou. Marmay kazèrn i domann zis inn ti kontra, i domann ziss in ti travay é dikou zot la tap zis ousa i fo vik dan lo ti mouvman ralé-pousé, lo mèr sin pir la trouv 30 contra édé pou zot. Konm koué i sifi sinploman domandé.

Dapré sak i di dopi yèr, po lo 30 contra édé, banna i di lé pa sifizan. Ala dikou, mi koné pa si banna la donn lo mo an minm tan, dopi yèr marmay chodron la ba sin – dni èk bann marmay sin-pir la désid boush shakinn son koté. Minm séga minm dans, banna i domann travay touzour. Sak lé nouvo, sék marmay sinn-dni i donn in solisyon. Pou zot si i réstor lo zoo sin-dni néna la plas pou donn travay inn dé dalon. Sin-pir konm sinn-dni minm rovandikasyon, ni vé travay. Sirtou, alé pa di partou travay la pwin.

In madam kandida zéléksyon rézyonal la di konm sa li va nyabou trouv 30000 anplwa pou banna. Mwin la anvi di, an minm tan domann madam la, vik li lété mèr é zordi li lé ankor dépité, li lé ki é shomiz èk gouvérman. Mé domann lèr la, atann pa domin apré zéléksyon. Dan nout sitiasyon, mi domann a mwin si lé pou vréman résponsab promèt 30000 anplwa. Aprésa ni étonn a nou si tanzaot nout zénèss i bouy. Sirtou, dopi lo 11 séptanm, èk lo 30 kontra édé, zot la konpri “Zanfan i plèr pa i gign pa tété“ !


Kanalreunion.com