Oté

Zanfan in kroizman rant Claude Guéant épi Le Pen

Justin / 8 févrié 2012

Dann gouvernman la Frans, nana in minis i apèl Claude Guéant. Li la désid zoué in rol pou sifone bann voi lo Front national, pou ral sa par koté lo pti prézidan Sarkozy. Donk, shak foi li na l’okazyon, li mank pa d’larg in fraz pou kontant in bann moun i pans zot i viv dan lo méyèr sivilizasyon ké nana, épi lo méyèr kiltir... Na poin lontan, li la trouv moiyin di : « Tout bann sivilizasyon na poin lo mèm valèr », donk sa i vé dir, in pé na plis valèr é d’ot na moin valèr, in pé lé sipéryèr é in pé inféryèr !
Si i grat in pé la dsou, mi pans i trouv dé shoz, sanm pou moin, i san pa tro bon. Konmsa mèm bann z’Éropéin la pran lo droi pou koloniz lo mond, pars zot té i amèn, d’apré zot, in sivilizasyon sipéryèr. Ni koné koman sa i apèl : sa i apèl kolonyalis, inpéryalis, i pé mèm apèl rasis. Mi kroi… konm lo santiman l’amèn bann solda amérikin pou fé sak zot la fé dsi bann Taliban mor. Zot la urine dsi bann kor, si mi tronp pa ! Isi ni préfèr anploy lo mo kiltir, mé kiltir èk sivilizasyon lé pa tro loin inn dé l’ot. Dann son liv "Concepts pour penser créole", Aude-Emmanuelle Hoareau i di, la kiltir kréol rényonèz, sé bann manyèr viv, bann kroiyans, lé shoz demoun i koné, lo bann manyèr amèn la vi artistik pou bann Kréol rényoné. Bien sir, aprésa, èl i dévlop, mé pou myé konèt son pansé, i vo myé alé lir lo liv épi sirtou bien réfléshi ; Sa lé bien nésésèr !
Zot i rapèl, kan té apré sèy fé la MCUR, l’avé in l’idé, sanm pou moin, lé révolisyonèr, pars bonpé d’moun ankor i partaz pa sa. Sé kan ou i anparl l’égalité bann kiltir. Mèm kan i di, i fo an avoir lo mèm konsidérasyon pou tout bann kiltir, moin lé sir na in bonpé i oi pa lé shoz konmsa. Sansa, pou kosa la bat atèr la MCUR ? Pou lo pri ? Alé dormi ! L’apré dépans plis pou mèt parékla dan la Mézon Volkan, sansa dann Mizé Stella. Non ! la bat atèr pars avèk la MCUR, nou té i sa oir la kiltir otroman, la not zordi, épi sèt nout bann z’ansèt. Boudikont, sak la koup la MCUR té in pé zanfan in kroizman rant Claude Guéant épi Le Pen.

Justin


Kanalreunion.com