Oté

Zanfan la mizèr i pran pa la kolèr

Justin / 4 octob 2013

Zot i koné zarèt poison ? Kan moin lété pti, konm mi abit dan lé o, ni voi zamé in morso poison dan mon zasièt.
Sé ryink kan papa i sar tous larzan kann tabisman Pierrefonds, li arpas par Sin-Pièr, li asèt sak li trouv si bord’mèr, là li armont, li ariv la kaz, i fé noir. Mi oua zamé lo poison antié. Momon dawar i nétoy ali, i fé kui èk dé-troi tomat pok pok bitasyon, nou manz èk nout mayi, wouèm. Dan la limyèr, ti lanp pétrol, ni woua pa koué i mèt dan la bous. Moin na souvnir nout paran i di a nou : « antansyon zarèt ». Konm ni manz èk la min — ryink papa lavé in kiyèr an plon —, pa difisil kan lo zarèt i pik out lang, ou trap a li, ou zèt a tèr po lo sat.
Pli tar, na in b- frèr Moufia i di a moin : « Oté, ogard Roger — in ot bof lo Port — koman sa i manz poison ; li fé rant dan son bous lo morso poison antié a gos, li mas, li mastik, li aval la sèr, tout lo bann ti zo i arsort koté droit, konm ki diré in ti lizin, bé koman li fé… i wa li lé abityé pi tan p’ti, giny ti makabi dan son diné ! ».
Mé a nou, mi sipoz, papa dawar té i pans, vitamine i mank a nou, manz toultan brèd morèl, mèt in ti zanimo i grosi dan la mèr salé sra bon po fé grandi son paké valal dan la kaz an pay !
Mèm si i pik out bous dann fénoir, i fé fré déor dan lé o, okip pa out doulèr, ogard out bann ti frèr, ti sèr, a zot osi, zarèt ti poison lapré pik zot palé, provik i d’sann pa dan la gorz, sra oblizé bour lo doi dann fon lalouèt po artir… la ress pri lo zafèr !
A ou, zanfan la mizèr i pran pa la kolèr.

 Justin 


Kanalreunion.com