Oté

« Zangouni i gingn solman fé pèr zoizo ! »

In kozman pou la rout

Justin / 22 novanm 2016

Zangouni ! kosa i lé sa ? Moin mi koné plito « zangoun » - adyé Zangoun, i vé dir adyé la konpagni. Zangouni, sanm pou moin, sa in mo malgash i vé dir : baba shifon-lépouvantaye si zot i vé ! Sa sé in n’afèr i mète dann zardin sansa dann karo mayi pou fé pèr zoizo. Donk lé vré, li fé pèr zoizo réèlman si li bouz konm i fo, pars si li bouz pa, zoizo i vien poz dési. Astèr ou i pé gaskone in moun, ou i pé trète ali konm baba shifon, l’épouvantaye, zangouni. L’èr-la, ou i pé dir kozman moin la mark an-o la i désote lo sans prop pou trap lo sans figiré. Mé, antansyon si ou la tonm dsi in moun siséptib… Mi souvien in foi désèrtin moun la gaskone in ga é la trète ali « spès zangouni ». Lo ga la pran la kolèr, la gingn la raz, la trap galé épi li la bonbard bann kasèr lé kui. Mi pé dir azot, lo bann gougnardèr la gingn la pate é la disparète vèy pa koman épi lo vré zangouni, lo moun ridikil, lété zot so kou isi. Alé ! Mi lès azot réfléshi la dsi é ni artrouv pli d’van sipétadyé !


Kanalreunion.com