Oté

Zanimo i fé viv a nou, nou viv ék zanimo !

Justin / 18 févrié 2014

Moin lé kontan, mon poul noir la giny 6 ti poulé. Na dé troi sominn moin la aport dan mon karodboi dé poul, inn pli zinn, inn pli vié,in zinn kok, in vié kok !
Lo vié kok, papang fini tié ; lo vié poul la moin té voi pi, dé foi mi voi na in volay la krèz in gro trou koté lo pié banane moin la planté ; mi voi in gro kaka koté grin mai moin la fané, mé mi voi pi lo poul dépi mi té antann a él kan él la fine ponn (kot, kot, katorz !).

Astèr ék toute mové tan, la pli, la pli té i arèt pa, sankonté losiin i trinn par la, mi té konte pi arovoir èl.
Bin, ièr matin, moin dan mon tant moin lapré lir an silans, mi antann kot,kot, kot ; bé mi di sa lo kot kot in poul nana pousin !
Moin la trouv inn ti siin koton noir, li dor si la bas milié la tant ; li bouz pa ; a moin si, fé pa dézord, akout, sort dousman, gèt : 6 ti poulé, pa tout minm koulèr ; domann pa moin ou sa lo monmon la parti kouvé !El la biin travay ; nana lo gri, lo maron, ék in tré vertikal milié latèt, lo tou noir konm él ; rouv sak granilé poulé dévlopman, done a zot in pé vitamine,sirtou fidéliz a zot ék mon landroi koté mon park kabri.

Moin la oubli di moin la fine aminn dé kanar, moin sé antèr in panié plastik étans dan la tèr,ranpli dlo, zot lé antouré ék in griyaz ; na mal, fémèl(in frèr ék in sèr),moin la pokor koup la zèl. Lé blan tou lé dé. Idiré i sort pol no ou pol sid !
Kabri, poul, kok, kanar, in ti siin po averti a moin si na marodèr la nuit i ariv !
Zanimo i fé viv anou, nou viv ék zanimo : sé la vi !

 Justin 


Kanalreunion.com