Oté

Zarboutan i kit a nou, pa riink inn… anon tiinbo flanbo

Témoignages.re / 7 décembre 2013

Koué ispas din kou, plito kou sir kou, Marc Kichnapaidou i mor, Mandela osi, sa i fé bokou po nou ; mi lès dot pli for ké moin rann omaz lo prézidan sidafrikin, alon may nout kondoléans èk toute sak la fine eksprime a zot si nout konpatriot Marc.

Pouatan, Marc té pa biin vié, mé li la komans ékri liv si téat réyoné biin zinn ; zot i rapèl « L’ouvrier réunionnais » ; po lépok té in révolisyon ; nou té lépok la ropresyon ; tansyon ti koz si lidantité kréol dan ton lang, lo pouvoir té i pran a toué po lo diab !

Kab kondane a ou po outraz la nasyon.

Mi rapèl ankor, in rapor daktivité an kréol, komine i konsidèr lasosyasyon i mérit pa sibvansyon, i mérit pa bénéfisi in lékol po in santr aéré !

Lékol, marmay i ginye koud règ si lo doi, minm dan la rékréasyon, si la antann a zot larg in kozman an kréol !

La gos i rantr an Frans an 1981— i libèr la kiltir laba — i libèr a nou dinn sertinn fason isi ; sé la ke nou wa nout Kichnapaidou dan la Direksyon zafèr kiltirèl (DRAC) montr a nou son kapasité éd bann kréol dan tout domèn, la mizik, téat, la léktir, lékritir, kont po zanfan, lo sinéma, la kréasyon ; anvoy bann zactèr kiltirèl an formasyon, po fé mont a nou pli o…

À moin sak moin la aprésié personèlman, sé in laksyon dan la prizon Sindni, ri Zilièt Dodi 1984 ; nou la zoué in piès téat — mi rapèl pi si té in ekstré « L’ouvrier réunionnais » —, dovan in santèn détenu… In lekspèrians unik, inoubliab.

É mi parl pa tout léd po bann dosié, tout prozé i vant nout patrimoine, larkéolozi…

Zarboutan i sava, anon arpran lo flanbo !

Justin


Kanalreunion.com