Oté

Zé d’toupi : Kit ou bien sèn ?

Justin / 30 novanm 2012

Mi an souvien bien ! Pou komansé, moin l’ashèt in toupi la boutik A-shine. Aprésa, moin la ranplas lo pti nay ridikil par in point klou bien droit é bien for. Lo zé i pé komansé. Avèk la lign koton, mi plot mon toupi maximom, in bout la lign roplié andsou pou k’i tien bien. Mi kapot ali tèt an ba, rant mon pous épi mon l’indèks, la lign mayé dan mon pti doi. Moin lé paré. Mon kamarad la mèt son vié toupi dann ron.

"Kit ! Ou bien Sèn ! ".

Mon kamard i kalkil. I kalkil mèm. Si li di "kit", i fo sé li k’i trap lo toupi avèk son lign, mé si li di kit, m’aranj amoin pou fé roul mon toupi in pti grin, zis in pti grin, épi va kapot dsi koté, dann zèrb, sansa dann i rokouin galé. Tro tar pou séné, tro tar pou trapé, mèm si mon kamarad lé vif. Pli vif, pli trèt ! Mi ékout ali. Mon déstin lé dan mon min ! Si li di sèn, m’a bien fé roul mon toupi, é konm na in pti plaz la tèr zis ousa nou l’apré zoué, lé sir m’a gingn séné, lé sir m’a gingn trapé. Mèm, m’a fé roul toupi-la dan mon min pou moin fé gout ali.

"Kité !" li la di.

Moin la pran mon distans. Sa i dépann d’apré l’anroulman... Mi gard son vié toupi kaziman dann zyé. Mi san mi sa lès mon mark dan son tèt. Mi san son poi lé o fé ! Son toupi lé konm in vié kok batay la fine ramas kou d’zargo dann tournoi in pé partou. Si tèlman k’i diré la fine fé la guèr. Moin lé paré, mi san mi sava mèt ali. Mon bra pli anlèr, konm armé pou shaboul galé, konm armé pou anvoy gronad péi. Mi majine mon kamarad i fèrm son zié par pitié pou son toupi, fidèl kamarad.

Lo kou la parti. Lo nay la rant an plin dann boi. La fé pik ! La pa fé pak. Pars si l’avé fé pak, nora fé pèt ali an dé ! Amoin ké nora bit boi kont boi ! La fé zis in gro mark lo klou an plis. Mon kamarad i trap son toupi. Li krash dési, épi li karès konm si li l’apré fé lo soin. I diré sé li ki soufèr pou l’ot.

« Sa lé an boi gouyav sa ! Sa lé solid ! Sa mon toupi ! », li di . Lo kèr in pé an lo kant mèm. Mé pétèt in pé kontan osi pars son toupi té blésé, mé pa mor.

NB : Modékri-la, moin la gingn l’idé-la kan moin la rogard l’éspozision foto la médiatèk lo Por. Dsi inn nana in group marmay apré zoué toupi. Alé oir, zot i pèrd ar pa zot tan.

Justin


Kanalreunion.com