Oté

Zé loséan indien : Kroir sa, sé kroir Pèr-noèl ! Sé pran po d’shanm pou pla kouvèr !

Justin / 17 out 2011

Moin té i kroir, bann Zé dé zil lété in bon lokazyon pou fé konète anou bann zil Sésèl, son lékonomi, son listoir, son zéografi, son bann péizaz éstraordinèr épi son kiltir. Dan mon kèr, moin té i di, avèk toute moiyin la télévizyon té i sava mète la-ba, moin té i sava konète Sésèl konm zamé moin la koni pti péi-la. In péi la pa loin, mé in péi mal koni par nou, Rényoné. Noré té bèl bien konète nout bann kouzin pou toute bann Rényoné, kansréti dann télé, si ni gingn pa oir an vré !
Moin té i kroir galman, té i sava profite lokazyon pou fé konète anou bann zil loséan indien : Madégascar li, Maurice li, Comore li, Maldive li, La Rényon li. Lokazyon lété bon, sirtou ké toute bann télé la mète zot moiyin téknik ansanm. A ! Si lo ko-dévlopman i pass par la konésans lé z’in-lé z’ot, lokazyon lété tro bèl pou aprann, kisoi nout zéografi, kisoi nout listoir, kisoi nout kiltir, kisoi nout problèm galman. Lokazyon lété bon, fransh vérité !
Moin té i pans, lété lokazyon fé in bon piblisité, intélizan é tout, par rapor bann pèp noré bien èm konète anou épi an avoir lanvi rann anou in pti vizite, pou oir anou an vré. Nora té in bon lokazyon fé avans lo tourism, plis sirman k’in batkaré Adélaïde, ou sansa in pti lanplasman dési in band passant dann léstade foutbal.
Ala sak moin té i kroir ! Ala sak moin té i pans ! Ala sak moin té i kalkil ! Mé kroir in n’afèr konmsa, sé kroir Pèr-noèl... sé pran po d’shanm pou pla kouvèr, makaroni pou la bouji.

NB : Proshin Zé dé zil, sé dann katran. An katran, na dé koi vni intélizan si ni vé sa pou vréman. Sof si bann gran shèf blan k’i gouvèrn anou konm dann tan lontan i vé touzour anpèsh anou sort dann fénoir.

Justin


Kanalreunion.com