Oté

Zéleksyon i ariv, atansyon diskour an lang do boi

Justin / 30 séptanm 2013

Lot zour moin lapré akout in kandida in méri dan lo sid ; mi di pa lakèl ; li organiz in gran pik-nik in gran plaz pétèt zot i koné !

Do moun nana ; dawar manzé osi nana ; pétèt rogay sosis, piman, inn ti vèr lo ronm, in ti lapéritif i fé rant dan lanbians ; près télévisé i film, zot lé invité.

Koué li done konm program ?

“Nou vé pran la plas lo mèr sortan aktièl ; nou lé in lékip do moun konpétan ; nana sak i apartiin parti politik mé na osi sak i viin la sosiété sivil ; tout s’ra kapab pran zot responsabilité ; o fo in bon gestion, nora poin riin po kamouflé, etc.”

Koué li la di egzaktoman ? Koué la popilasyon i rotiin ? Koué i raport bann zéléktèr, bann sitoyin la komine ?

Ninport kèl kandida i poura koz konm li la kozé ! droite ou gos ! isi La Rényon ou dan in ot péi !

Zordi konm ièr ; dan lé zané 50 ou 90, 19éme sièk, 20éme ou 21éme !

Mi trouv, ariv si la sèn politik, po rakont riink zénéralité ; mèt pa riin d’konkré d’dan ; rès téorik sèlman ; anploy term — an fransé i di galvaudé — sinon vid, kré (comme creux), lo kréol ki aplodi sa, li lé prè po bat la min si tout é si ninport koué.

Bann diskour i vé riin dir ; na okin sans dan la pratik ; si ou giny pa èksplik èk in mo ki parl dan lo koko domoun, sa i apèl la lang do boi ; sè fraz i pas partou ; i fé biin ; boug la i koz biin.

Moin mi di si ou la poin riin po di, di pa ariin, ékout lé zot… atansyon, lané prosinn zéléksyon i sar arivé , donn pa nou tro diskour an lang do boi !

Justin


Kanalreunion.com