Oté

Zéléksyon sénatèr : Konm di Popèk : « Doné-moi lo vinkèr, pa lo vinki ! »

Justin / 29 zwin 2011

Moi d’séktanm, zéléksyon sénatèr i ariv. Sétaki i san son kor. Sétaki i fé zoué son misk. Ni sa oir, ni sa oir sak ni sa oir ! Parti sosyalis i vé kont son pti, donk li vé alé ! Virapoullé galman i vé rant dann ron !
Virapoullé, sé lo boug la pa gingn sink pour san dann zéléksyon réjyonal. Sé dir si li lé popilèr dann la popilasyon rényonèz. Lé pa étonan vi k’boug-la la mète son tan a kasé, la pass son tan pou anpèsh lo dévlopman La Rényon, épi la roshèrch bann Rényoné zot dignité, épi zot l’idantité… li la touzour préfèr son biznèss pèrsonèl ké l’intéré bann Rényoné. An souvien azot ! Li la pran la tète lo mouvman Koup pa nou... ziska zordi, lo sid i fini pa arète pèy konsékans so konplo-la.
Dann konba-la, li la artrouv son dalon pou touzour… li la artrouv Vergoz. Sète-la k’la fé kapote lo projé bidèpe parti sosyalis l’avé fé, soi dizan son parti ! — ankor in koup pa nou ! Mé ankor in louzèr. Avèk li, parti sosyalis la gingn moins zéli dann Konsèy réjyonal ké zamé. L’èr-la, li la pa mète ali dann l’opozisyon kont l’UMP, mé li apiy lo rin so parti-la. Li pran parti pou lo bo Didier, é kan sète-la lé in pé a-kour, sé li ki mont dési lo fron anti’Alyans, anti-Vergès, anti-Rényoné. Mi pans pa in pé va kontro-di amoin kan mi di, koméla, lé dé konpèr sé de louzèr, é lé pa bon paryé dési lo pèrdan.
Sa i fé pans amoin in éskètch in boug i apèl Popèk. In ga i anfil la kouyonis, konm in pé i anfil grin job, sansa pèrl, pou fé in kolyé, sansa in braslé. Donkalor, Popèk i rant dann in réstoran épi li doman in oumar, mi kroi ; In sèrvèr i amenn ali son oumar ; i mank in pins. L’èr-la, lo sèrvèr i di ali, l’avé dé oumar dann in lakouariom ; Lé dé la fou in batay ; inn la pèrd son pins. Astèr-la, Popèk i di ali, falé amenn lo vinkèr, pa lo vinki. Pou mon par, mi di, in sosyalis, ansanm sak lé an dalonaz avèk Virapoullé, lé té myé shoizi in vinkèr plito k’in louzèr. Konm di Popèk, i falé mé doné lo vinkèr, pa lo vinki.

NB : Grinn job, in zèrb mèm famiy ké kane, mayi, do-ri. Té i ansèrv séréal dann la Chine avan banna la komans plante mayi. Dann bann monastèr, té i fé kolyé èk lo grin. Dann désèrtin péi, i mète lo grin sou zoryé pou kass bon somèy. In pé i pans galman, grinn job i porte la shyass.

Justin


Kanalreunion.com