Oté

Zéléksyon Sin-Lé : « Sinonsa, lé dé ansanm, mon zénéral ! »

Témoignages.re / 7 août 2009

Moun l’éspri kourte nana partou : kisoi demoun issi, sansa demoun déor, zoli moun, vilin moun, grann pèrsone konm pti marmay, vyé konm jènn, kass-papaye san golète konm pti nin. Dizon son kafé la poin triyaz, sa in maladi i pé anklav la tète nout toute, si ni porte pa antansyon.
Pou kossa mi di sa ? Pars konsèy d’Éta, donkalor dmoun déor, byin instruiyé, lo pla byin garni, anplis ké sa i pass pou moun byin, l’élite la Républik, la fé in gran lékol i apèl l’ENA, demoun i mète pa pass-doi… i sorte anil inn-dé zéléksyon.
An parmi sète Izabèl Poudroux, dann in kanton Sin-Lé, pou tout sort rézon. Mé na inn, si sa lé vré, lé ziska trakassan. I parl in késtyonn grataz ti-boi, donk in késtyonn sorsèlri, in zistoir d’lanboulkidi. In fanafoute, si zot i vé. Alors, l’ansyin mèr la gingn in rès trankil pars son l’advèrsèr la fé lo sor. Alors demoun kartyé troi-lète, léspri sré si tèlman dann fénoir ké mèm pou in votaz, zot yin pa bou fé solon z’ot prop l’opignon, si in pé la fé lo sor ? I prétan k’in bon pé dmoun noré pèrd la rézon ? Touléka, i paré... vi k’konsèy d’Éta i pran sa o séryé, sansa i fé sanblan.
Moin pèrsonèl, mon lédikasyon i vèrs pa mon léspri dann "malkoté" konmsa, é mi pans pa dann bann ziz La Frans la-ba, na in pé i kroi so z’afèr-la. Afors fé travay mon tète, moin la fini par mazine in vyé kozman k’i di konmsa : « Soi in pé, l’éspri lé kourte, soi i fé konmsi li lé kourte, sinonsa lé dé ansanm, mon zénéral ! »

Justin


L’ésplikasyon inn-dé pti-mo :

In kass papaye san golète : in moun si tèlman li lé gran, li la pa bézoin in golète pou kass in papaye.

lanboulkidi, fanafoute : lo sor.

In rèss trankil
 : in n’afèr pou dékouraz aou kontinyé oute program, in défète.

L’éspri kourte
 : in moun pa tro fité.

Dann son kafé na poi triyaz
 : i shoizi pa la tète.


Kanalreunion.com