Oté

Zéléksyon Sint-Sizane : Lapinn lo pou ashté la konsyans bann sitoiyin ! Manjé kui pou ashète bann voi !

Justin / 23 zanvié 2012

Sak i suiv in pé laktyalité dopi lontan, moin lé sir, la fine antann in pé tout z’afèr dsi zéléksyon la Rényon. Sof l’onèteté, moin lé sir é sèrtin, nou la fine konète in pé tout z’afèr. Nou la fine konète la frode brital, la vyolans, falsifyé rézilta. Nou la fine konète la koripsyon, in pé tout manyèr. Nana bann frodèr istorik, la loi la zamé kondane azot. Nana bann frodèr patanté zéléksyon anilé plis inn foi, i anpèsh pa zot kontinyé fé lo pan in pé partou, an parmi bann sitoiyin.
I oi zot fé maryaz, déboush l’anvlop z’apèl d’ofre. I oi zot gonf zot pla san traka.

Dann nout parti, la frode la pa lo bienveni, la koripsyon non pli, pars nout l’idéal sé réspèk la dignité d’moun, réspèk lo sifraj inivèrsèl. Nout bann z’advèrsèr- i pé mèm di nout zènmi !- sa la pa zot règ de vi é i fo dir la Répiblik fransèz la ankouraj azot souvan dé foi pou frodé é la zistis, pli souvan k’son tour, la konsidèr azot konm intoushab. Mé na in kroiyans k’i di konmsa firamézir, lé shoz lé in pé pli prop, la zistis in pé pli zis, é lo sifraz inivèrsèl in pé pli réspékté. Alé oir zot !

Noré pi dir,dann zéléksyon Sint-Sizane vi k’sé in zéléksyon parsyèl, tout kandida noré mète dakor pou fé in zéléksyon prop, in zéléksyon onète, mé i fo pa kroir Pèrnoèl pars i spas drol de shoz dan l’èst. I prétan dir bann bon larzan i sirkil an dous é san sokous. Déssèrtin kamarad la vi propoz demoun larzan pou kite rényon Gironcel pou alé dan i rényon trayizon. I prétan dir, i ofèr déssèrtin zéléktèr poulé d’lo, kuis poulé,épi tout sort kalité la manjaye ou lé pa sir lé bien fré.

Moin la mèm antann in n’afèr. In pé la ofèr in famiy lapin konzlé, kaziman lapinn lo pou ashté zot voi. In konsyans demoun pou in lapinn lo. Mi pans zot lé dakor avèk moin pou dir la pèrsone nana lo poukoi, i sèy ashète in moun la poin èk in lapinn shine, sa la pa in moun i réspèk son proshin. Sa la pa in moun i mérite ète in roprézantan la popilasyon. Konm di Gironcèl, i ashté pi d’moun èk manjé kui !

 Justin 


Kanalreunion.com