Oté

Zénérasyon manké, pa san pour san, mé kant mèm...

Justin / 14 zwin 2011

Nout l’istoir lé pa tro long. Dizon dépi 1638 ziska zordi. Plis si i kont lo tan bann navigatèr in pé tout sort nasyon té i pass loin-an-loin. Mé la pa pou sa ké li lé koni a-fon, pars nana touzour déssèrtènn shoz pou rodé, déssèrtènn shoz pou trouvé... é pétète pou pa trouv zamé. Touléka, mi pans ni doi z’ète modèst dovan nout listoir é sirtou pa pans ni koné aèl bien, dépi la lète A ziska la lète Z. Bann moun i shèrsh i fé zot boulo, épi lé shoz i avans, défoi vite, défoi dousman, mé sa lé normal, konmsa mèm la roshèrch i fonksyone.

Mi di sa pars nana in pé i mazine zot la fine trouv tout san shèrché, la fine konète tout san aprann in bonpé. In dalon la di amoin, li la parti akout in konférans zistoman déssi listoir La Rényon, vi k’té i anparl lésklavaz. L’èr lo konférans lé fini, nana in sobatkoz avèk lo moun lé dan la sal… i prétan dir, nana in pti groupman d’moun l’ariv ansanm épi la fane in pé dann lo piblik. Zot la poz késtyon. Non pa sa pou vréman ! Inn la di, lo konféransyé la ékrir dann son liv in n’afèr paz tan, é li lé pa dakor avèk. In n’ot dalon ali la di lo mèm z’afèr pou in n’ot paz, insi d’suit, insi d’suit. Lo konféransyé la domann azot kosa, zot pèrsonèl, zot i an pans. Zot i réponn pa, zorèy koshon dann marmite poi. Sanm pou mon dalon, zot la pa vni la pou sa. Zot l’avé konm in kont pou réglé ! Alé savoir !

Poitan, in batay z’idé, in bon sobatkoz séryé, sa i fé avans lé shoz, sa i fé konprann in pé myé nout l’istoir, é sa sé in n’afèr ki kont, vi ké nana in pé i rode arienk pou déform nout pasé, pou gaskone ali. Alor, sak i vé konète bien la vérité, zot na intéré ké bann z’idé i sobat inn avèk l’ot, mèm si nana lo shok bann z’idé. Sa lé bon osi ! Moin, mi oi lé shoz konmsa, pars sansa, nou lé riskab done bann révizyonis de boi pou tap anou, pars zot nana intéré pou déguiz nout listoir, é si ni sobate rant nou, rant sak i vé konète la vérité pou vréman, banna lé dann zot bèr é nou dann la difikilté. Ni vé, ni vé pa, mé lé konmsa, é si ni fé pa atansyon, bann zénérasyon k’i vien sar blizé rokomans sak nout zénérasyon la pa nyabou fé. Dizon, in zénérasyon manké, pa san pour san, mé kant mèm in bonpé.

 Justin 


Kanalreunion.com